Хоразмда ишга жойлаш учун 4,5 минг доллар талаб қилган ИИО ходими ушланди
Бир қатор ҳудудларда ишга жойлаштириш, рухсатнома ва нафақа тайинлаш билан боғлиқ коррупция ҳолатлари фош этилди.
Ўзбекистонда ишга жойлаштириш, турли рухсатномаларни расмийлаштириш ҳамда ижтимоий нафақа тайинлаш жараёнлари билан боғлиқ бир қатор коррупция ҳолатлари аниқланди. Бу ҳақда ДХХ маълум қилди.
Қайд этилишича, Давлат хавфсизлик хизмати ходимлари томонидан Бош прокуратура ҳузуридаги Департамент ҳамда ички ишлар органлари билан ҳамкорликда ҳудудларда тезкор тадбирлар ўтказилган.
Хоразм вилоятида аниқланган ҳолатда, вилоят ИИБ Жамоат тартибини сақлаш бошқармаси кичик инспектори ўз хизмат мавқеидан фойдаланиб, фуқаронинг ишончига кирган. У фуқаронинг танишини ички ишлар органларига ишга жойлаштириб беришни ваъда қилиб, 4,5 минг АҚШ доллари талаб қилган. Тезкор тадбир давомида инспектор олдиндан 1 800 АҚШ доллари ва 2,4 млн сўм олган вақтида ушланган.
Тошкент вилоятидаги ҳолатда эса туман мактабгача ва мактаб таълими бўлими методисти хусусий оилавий боғча ташкил этмоқчи бўлган фуқародан рухсатнома олиб бериш эвазига пул талаб қилган. У санитария талабларига мослик бўйича ҳужжат тайёрлаш учун 1,5 млн сўм, ёнғин хавфсизлиги бўйича ижобий хулоса олиш учун эса 200 АҚШ доллари сўраган. Методист пул маблағларини олган вақтида ушланган.
Шунингдек, тезкор тадбир давомида ушбу маблағнинг бир қисмини олган туман Фавқулодда вазиятлар бўлими катта инспектори ҳам қўлга олинган.
Қорақалпоғистон Республикасида ҳам шунга ўхшаш ҳолат қайд этилган. Чимбой туманида яшовчи аёл Кегейли тумани фуқаросига ёшга доир нафақа тайинлаб беришда иш стажини сунъий равишда кўпайтиришни ваъда қилиб, 7 млн сўм олган вақтида ушланган. Маълум бўлишича, у бу ишни Камбағалликни қисқартириш ва бандлик вазирлигида ишловчи ўғли орқали амалга оширишни режалаштирган.
Ҳозирда барча ҳолатлар юзасидан жиноят ишлари қўзғатилган бўлиб, тергов ҳаракатлари олиб борилмоқда.
