Тошкентдан Иссиқкўлга автобус қатновлари 8 июндан бошланади
Автобуслар июнь ойининг жуфт кунларида Тошкентдан ҳаракатланади, тоқ кунларда Иссиқкўлдан қайтади. Бир томонлама чипта нархи 365 минг сўм бўлади.
2026- йил 8 июнидан бошлаб Тошкент ва Қирғизистоннинг Иссиқкўл ҳудуди ўртасида мавсумий автобус қатновлари йўлга қўйилади. Бу ҳақда Транспорт вазирлиги хабар берди.
Маълум қилинишича, қатновлар "Uzautotrans Service" МЧЖ томонидан Тошкент – Чўлпонота (Иссиқкўл) йўналиши бўйича амалга оширилади. Автобуслар июнь ойининг жуфт саналарида Тошкентдаги “Тошкент” автовокзалидан ҳаракатланади, Иссиқкўлдан Тошкентга қайтиш рейслари эса ойнинг тоқ кунларида бажарилади.
Йўловчиларга хизмат кўрсатиш учун Ютонг русумидаги автобуслар жалб этилади. Автобус ҳар куни соат 15:00 да “Тошкент” автовокзалидан жўнаб кетади.
Мазкур йўналиш бўйича бир томонлама чипта нархи 365 минг сўм этиб белгиланган.
Қўшимча маълумотларни +998 71 207-87-00, +998 94 131-99-99 ҳамда +998 88 666-15-15 телефон рақамлари орқали олиш мумкин.
