Тошкентда 1 сентябрдан йўловчилар йўл ҳақини автобусга чиқиш вақтида тўлаши шарт бўлади
Белгиланган тартибда йўлкира ҳақи тўланмаса ёки имтиёз тасдиқланмаса, йўловчи чиптасиз ҳаракатланган деб ҳисобланади.
Ҳукуматнинг “Шаҳар йўловчи транспорти тизимини янада такомиллаштириш бўйича қўшимча чора-тадбирлар тўғрисида”ги қарори қабул қилинди. Қарор 2026 йил 3 июнда тасдиқланган. Бу ҳақда Транспорт вазирлиги хабар берди.
Ҳужжатга кўра, ҳайдовчи билан бирга камида 60 нафар йўловчини ташишга мўлжалланган, “Евро-5” ва ундан юқори экологик стандартларга жавоб берадиган М3 тоифадаги янги автобус, электробус ва троллейбусларни 2027 йил 31 декабрга қадар Ўзбекистонга импорт қилишда утилизация йиғимининг ноль ставкаси қўлланилади.
Шунингдек, брутто-шартнома асосида фаолият юритувчи мунтазам шаҳар автобус йўналишларида тушумлар тўлиқлигини таъминлаш мақсадида 2026 йил 1 сентябрдан янги тартиб жорий этилади.
Унга кўра, йўловчилар йўлкира ҳақини автобусга чиқиш вақтида валидаторлар орқали транспорт картасини валидация қилиш, банк карталари, смартфонлар ва бошқа контактсиз электрон тўлов воситалари (NFC, QR, биометрик технологиялар, BLE, UWB ва бошқалар) ёрдамида тўлашлари ёки ижтимоий ва транспорт карталари орқали имтиёзли ёки бепул юриш ҳуқуқини тасдиқлашлари керак бўлади.
Белгиланган тартибда йўлкира ҳақи тўланмаса ёки имтиёз тасдиқланмаса, йўловчи чиптасиз ҳаракатланган деб ҳисобланади.
Қарор билан шаҳар автобус йўналишлари тушунчасига ҳам ўзгартириш киритилди. Эндиликда шаҳар ҳудудидан 5 километргача, шунингдек, транспорт ва йўл-транспорт инфратузилмасини ривожлантириш бўйича тасдиқланган бош режаларга мувофиқ 12 километргача ташқарига чиқадиган йўналишлар ҳам шаҳар автобус йўналишлари сифатида эътироф этилади.
Бундан ташқари, Транспорт вазирлиги тегишли вазирлик ва идоралар билан ҳамкорликда 2026 йил 1 сентябрга қадар пойтахт жамоат транспорти ҳамда шаҳар атрофи темир йўл қатновлари учун ягона интеграциялашган тўлов тизимини жорий этади.
Тизим доирасида “электропоезд–автобус” ва “электропоезд–метро” йўналишлари учун қулай тариф режалари ҳам ишлаб чиқилади.
