Жанубий Кореянинг собиқ президенти 30 йилга қамалди
Юн Сок Ёл Шимолий Кореяга дрон юбориш операциясини ташкил этишда айбдор деб топилди.
Жанубий Кореянинг Сеул марказий суди мамлакат собиқ президенти Юн Сок Ёлни Шимолий Корея ҳудудига дронлар юбориш билан боғлиқ иш бўйича 30 йил муддатга озодликдан маҳрум қилди. Бу ҳақда Yonhap ахборот агентлиги хабар берди.
Суд материалларига кўра, собиқ президент 2024 йилда Шимолий Корея ҳудудига дронлар юбориш операциясини ташкил этишда айбдор деб топилган. Тергов маълумотларига кўра, ушбу ҳаракатлар Корея яриморолида кескинликни кучайтириш ва кейинчалик ҳарбий ҳолат жорий этиш учун асос яратишга қаратилган бўлган.
Мазкур иш доирасида собиқ мудофаа вазири Ким Ёнг-ҳюн ҳам 30 йилга озодликдан маҳрум қилинган. Суд қарорида айбланувчилар Шимолий Корея томонидан жавоб ҳаракатларини қўзғатиш мақсадида ҳарбий операциялардан фойдалангани қайд этилган.
Бу Юн Сок Ёлга нисбатан чиқарилган илк оғир ҳукм эмас. Аввалроқ у 2024 йил декабр ойида жорий этилган ҳарбий ҳолат билан боғлиқ исён ишида ҳам умрбод қамоқ жазосига ҳукм қилинган эди.
