Мессининг отаси вафот этди — телебошловчи
Хорхе Мессининг ўлими ҳақидаги хабар тасдиқланмади, уни тарқатган бошловчи эса ишдан кетишини маълум қилди.
Аргентинанинг Luzu TV телеканали бошловчиси Пена футболчи Лионел Мессининг отаси Хорхе Мессининг вафоти ҳақида асоссиз маълумот тарқатгани учун омма олдида узр сўради ва ўз лавозимини тарк этишини маълум қилди.
Маълум қилинишича, Luzu TV'нинг El Show del Verano дастури эфирида Пена Хорхе Месси вафот этгани ва бу сабабли Лионел Месси Жаҳон чемпионатини тарк этишга мажбур бўлиши мумкинлигини айтган. Орадан кўп ўтмай ушбу маълумот тасдиқланмагани маълум бўлган.
18 июнь куни телебошловчи расмий баёнот билан чиқиб, йўл қўйилган хато учун Месси оиласидан узр сўраган. У мазкур маълумотни жонли эфир вақтида дастур продюсерлари томонидан тасдиқланган хабар сифатида қабул қилгани, бироқ хатодаги ўз масъулиятини ҳам тан олишини билдирган.
“Месси оиласи бошдан кечираётган оғир вазиятда қўшимча ташвиш манбаига айланганимдан жуда уяламан. Хатодаги ўз ҳиссам учун жавобгарликни зиммамга оламан ва шу сабабли Luzu TV'даги фаолиятимни тўхтатишга қарор қилдим”, — деган Пена.
Шунингдек, Luzu TV раҳбарияти мазкур воқеа юзасидан ички текширув ўтказилаётганини ва дастур жамоасидаги бир қатор ходимлар билан ҳам хайрлашилиши мумкинлигини маълум қилган.
Аввалроқ, Месси 2026 йилги Жаҳон чемпионатида Жазоирга қарши баҳсда гол урганидан сўнг кўз ёшларини тиёлмагани ортидан унинг отаси Хорхе Мессининг саломатлиги билан боғлиқ муаммолар ҳақида хабарлар тарқалган эди. Бироқ Месси оиласи Хорхе Мессининг вафот этгани ҳақидаги хабарларни рад этган.
Эслатиб ўтамиз, аввалроқ Британиянинг Radio Caroline радиостанцияси эфир вақтида техник хатолик туфайли қирол Чарлз III вафоти ҳақида нотўғри хабар эълон қилинганди. Кейинчалик станция мазкур ҳолат юзасидан тингловчилар ҳамда қироллик оиласидан расман узр сўраган.
