Қорақалпоғистонда банк ходимлари ва ҳоким ёрдамчилари 1,4 млрд сўмлик имтиёзли кредитларни ўзлаштирди
Улар 37 нафар фуқаронинг номига кредит расмийлаштириб, пул маблағларини талон-торож қилган.
Қорақалпоғистон Республикасининг Беруний туманида имтиёзли кредит маблағларини ўзлаштириш билан боғлиқ ҳолат фош этилди. Бу ҳақда Бош прокуратура ҳузуридаги Департамент хабар берди.
Маълум қилинишича, Департаментнинг Беруний тумани бўлими томонидан ўтказилган терговга қадар текширувда тижорат банкининг банк хизматлари маркази масъул ходимлари, 7 та маҳалладаги ҳоким ёрдамчилари ҳамда бошқа шахслар ўзаро тил бириктиргани аниқланган.
Улар 37 нафар фуқаро номига жами 1,4 миллиард сўм миқдорида имтиёзли кредит ажратилишига эришиб, ушбу маблағларни ўзлаштириш йўли билан талон-торож қилган.
Мазкур ҳолат юзасидан Жиноят кодексининг тегишли моддалари билан жиноят иши қўзғатилган. Ҳозирда тергов ҳаракатлари олиб борилмоқда.
