UEFA FIFA тижорий режасидан воз кечмаса, ЖЧни бойкот қилади
UEFA ва унга аъзо 55 та миллий футбол ассоциацияси FIFA Жаҳон чемпионати бўйича янги тижорий режасини бекор қилмаса, ташкилот мусобақаларида иштирок этмаслигини маълум қилди.
Financial Times хабарига кўра, UEFA пайшанба куни онлайн форматда ўтказилган фавқулодда йиғилишда FIFA'нинг янги тижорий лойиҳасига қарши чиқди. Қарорга кўра, агар FIFA ушбу режадан воз кечмаса, UEFA'га аъзо мамлакатлар FIFA мусобақаларини, жумладан Жаҳон чемпионатини бойкот қилади.
UEFA баёнотида қайд этилишича, FIFA таклифи тўлиқ бекор қилинмагунча ташкилотга аъзо бирорта ҳам миллий терма жамоа FIFA турнирларида қатнашмайди.
Гап FIFA президенти Жанни Инфантино илгари сурган, қиймати 20 миллиард долларга баҳоланаётган янги тижорий тузилмадаги 20 фоиз улушни хусусий инвесторларга сотиш режалари ҳақида бормоқда. ФИФА ушбу битимдан тушадиган маблағни ўзининг 211 та аъзо ассоциациясига йўналтиришни, ҳар бирига олдиндан 20 миллион доллардан ажратишни режалаштирган. Бироқ UEFA бу ташаббусни кескин рад этди.
“Жаҳон чемпионатига инвестиция маҳсулоти сифатида қараш мумкин эмас. Унинг ҳеч бир қисми хусусий инвесторларга топширилмаслиги керак. Жаҳон чемпионати сотилмайди”, — дейилади ташкилот баёнотида.
Нашрнинг қайд этишича, UEFA таркибига Испания, Франция ва Англия каби футболнинг етакчи давлатлари киради. Шу боис Европа жамоаларисиз Жаҳон чемпионатининг тижорий жозибадорлиги сезиларли даражада пасайиши мумкин.
Бойкот қарори FIFA ва UEFA ўртасидаги сўнгги йиллардаги энг жиддий қарама-қаршиликлардан бири сифатида баҳоланмоқда. Англия футбол ассоциацияси ҳам UEFA позициясини қўллаб-қувватлашини маълум қилган.
FIFA'нинг собиқ президенти Зепп Блаттер ҳам Жаҳон чемпионатини бошқариш учун алоҳида компания ташкил этиш ва унинг 20 фоиз улушини ташқи инвесторларга таклиф қилиш режасини кескин танқид қилганди.
