Қашқадарёда ҳайдовчи ЙПХ машинасини уриб, қочишга уринди
Ҳайдовчи икки чорраҳада ЙПХ ходимларининг тўхташ ишорасига бўйсунмай, ҳаракатини давом эттирган.
Қашқадарё вилоятининг Чироқчи туманида ЙПХ ходимларининг қонуний тўхташ ишорасига бўйсунмаган Nexiа-2 ҳайдовчиси патруль автомашинасини уриб, воқеа жойидан қочишга уринди. Бу ҳақда вилоят ИИБ матбуот хизмати хабар берди.
Маълум қилинишича, тунги хизматга жалб қилинган ЙПХ инспекторлари ҳужжатларни текшириш мақсадида Nexiа-2 автомашинасини тўхтатган. Бироқ ҳайдовчи тўхташ ишорасига бўйсунмай, ҳаракатини давом эттирган.
Кейинги чорраҳада хизмат олиб бораётган ЙПХ ходими ҳам ҳайдовчига бир неча бор тўхташ ишорасини берган. Шунга қарамай, у ички ишлар органлари ходимларининг қонуний талабларини бажармаган.
Патруль экипажи ҳайдовчининг ҳаракатини қарама-қарши йўналишда ҳаракатланган хизмат автомашинаси ёрдамида чеклашга уринган. Бироқ Nexiа-2 ҳайдовчиси патруль автомашинасини уриб, яна воқеа жойидан қочишга ҳаракат қилган.
Кўрилган тезкор чора-тадбирлар натижасида ҳайдовчининг шахси аниқланиб, у ушланган.
Ҳайдовчи дастлабки изоҳида ҳужжатлари йўқлиги сабабли ЙПХ ходимларидан қўрқиб, тўхтамасдан ҳаракатланганини билдирган.
Ҳозирда ҳолат юзасидан Чироқчи тумани ИИБ томонидан терговга қадар суриштирув ишлари олиб борилмоқда.
Эслатиб ўтамиз, аввалроқ Фарғона вилоятида «Spark» бошқарган маст ҳайдовчи ЙПХ ходимининг қонуний тўхташ талабига бўйсунмасдан ходимни уриб юборгани ва ходим олган жароҳатлари оқибатида вафот этгани ҳақида хабар берилган эди.
