Қиймати 400 БҲМдан ошадиган товарлар учун нақд пулда тўлов қилиб бўлмайди

Ўзбекистонда қиймати базавий ҳисоблаш миқдорининг (БҲМ) 400 бараваридан ошадиган товар ва хизматлар учун тўловларни нақд пулда амалга ошириш тақиқланди. Эндиликда бундай тўловлар банк карталари ёки электрон тўлов тизимлари орқали амалга оширилади. Бу Президентнинг 27 августдаги фармонида белгиланган.

 

Аввал мазкур чеклов қиймати 25 млн сўмдан ошадиган товар ва хизматларга нисбатан қўлланган. Янги тартибга кўра, чегара БҲМнинг 400 баравари этиб белгиланди.

 

2026 йил 1 сентябрдан БҲМ 412 минг сўмдан 440 минг сўмга оширилиши муносабати билан 400 БҲМ 176 млн сўмни ташкил этади.

 

Нақд пулсиз тўлов мажбурий бўлган ҳолатлар қаторига давлат органлари кўрсатадиган хизматлар, электр энергияси, табиий газ ва ичимлик суви учун тўловлар, алкоголь ва тамаки маҳсулотлари, ёқилғи қуйиш шохобчаларида нефть-газ маҳсулотларини сотиш ҳамда электромобилларни зарядлаш хизматлари киради.

 

Шунингдек, қиймати 400 БҲМдан ошадиган товар ва хизматлар, кўчмас мулк объектлари, ишлаб чиқарилганига 10 йилдан ошмаган М, Н, О ва Г тоифадаги транспорт воситалари ҳамда махсус автотранспорт воситаларининг олди-сотдисида ҳам тўловлар банк картаси ёки электрон тўлов тизимлари орқали амалга оширилади. Қишлоқ хўжалиги маҳсулотлари бундан мустасно.

 

Фармонда тадбиркорлик фаолиятини ҳимоя қилишга қаратилган бошқа чоралар ҳам белгиланган. Жумладан, давлат органлари ва тадбиркорлик субъектлари ўртасидаги оммавий-ҳуқуқий муносабатларда тадбиркорнинг ҳақлилик презумпцияси амал қилади.

 

Қонунчиликдаги бартараф этиб бўлмайдиган зиддият ва ноаниқликлар, шунингдек, давлат органи тақдим этган далилларнинг етарли эмаслиги сабабли юзага келадиган шубҳалар тадбиркор фойдасига талқин этилади.

 

Бундан ташқари, тадбиркорлар учун “Иккинчи имкон” иқтисодий амнистияси жорий этилади. Молиявий жарима қўллашда биринчи хато учун огоҳлантириш бериш қоидаси киритилади. Кичик тадбиркорлик субъектларини текширишга эса уч йил муддатга мораторий жорий этилади.