Теҳрон ядро келишуви бўйича АҚШдан жавоб олди. Бу ҳақда Эрон ТИВ расмий вакили Носир Канони Чафи маълум қилди.
“Эрон томони ЕИ координатори орқали АҚШдан ядро келишувига қайтиш юзасидан жавоб олди. Биз Америка таклифларини диққат билан ўрганишга киришдик ва координаторга бу ҳақда ўз фикримизни айтамиз”, — деган дипломат.
Маълумот ўрнида: 2015 йилда Эрон ва АҚШ, Буюк Британия, Германия, Франция, Россия ҳамда Хитой ўртасида “Ҳамкорликдаги умумий ҳаракатлар режаси” имзоланган. Унга кўра, Теҳрон ядро қуроли ишлаб чиқишдан воз кечиши, Ғарб эса иқтисодий санкцияларни бекор қилиши лозим эди. Аммо 2018 йилда АҚШ бу келишувдан чиқиб кетди.
Жозеф Байден АҚШ президентига айлангач, келишувни қайтиб тиклаш ташаббуси билан чиқди. 2021 йилдан бошлаб Венада саккиз раундли музокаралар ўтказилди. 11 март куни томонлар ташқи факторлар туфайли танаффус олди. Унга асосий сабаб қилиб Россиянинг Украинадаги ҳарбий операцияси кўрсатилмоқда. Бунга қадар музокаралар финал босқичига чиққан ва февраль охирида якунланиши керак эди. Сўнгги ойларда Европа воситачилигида ядро келишуви бўйича музокаралар фаоллашди.
Аввалроқ Эрон ядро қуроли яратмаслигини маълум қилганди.