АҚШ ваъдасининг устидан чиқмади —Амир Хон Мутаққий
Афғонистон ТИВ раҳбари Вашингтон билан эришилган келишувларни очиқлади.
Афғонистон ташқи ишлар вазири вазифасини бажарувчи Амир Хон Мутаққий АҚШни мавжуд келишувларни бузишда айблади. Бу ҳақда у “РИА Новости”га берган интервьюсида айтган.
“АҚШ айрим ваъдаларининг устидан чиқмади. Масалан, шартномада ислом амирлиги (“Толибон” Афғонистонда тузилган янги давлатни шундай номлайди, у ҳеч қайси давлат томонидан тан олинмаган) асирларини бир неча кун ичида озод қилиш белгиланган. Аммо бу биз Кобул ва бошқа вилоятларни назоратга олмагунимизча амалга ошмади, уларни ўзимиз озод қилдик”, – деган ТИВ раҳбари.
Шу билан бирга Мутаққий Вашингтон янги ҳукумат расмий вакилларини қора рўйхатдан чиқармаганини қайд этди. Бу ҳам ўзаро келишувларнинг шартларидан бири бўлган.
“АҚШ АФғонистон тикланишида ёрдам беришни ва бошқа давлатларни бунга чақиришга ваъда берганди. Бунинг ўрнига улар санкцялар жорий этди”, – деб айтган сиёсатчи.
Шундай бўлса-да, “Толибон” ташқи ишлар вазири Кобул Америкага берилган кафолатларни устидан чиққанини айтган. Унинг сўзларига кўра, АФғонистон АҚШ билан иқтисодий ҳамда дипломатик алоқаларни сақлаб қолиши керак бўлган ва бу амалга оширилган.
Эслатиб ўтамиз, аввалроқ “Толибон” вакили аёлларнинг мудофаа соҳасида ишлаши мумкинлигини айтгани тўғрисида хабар қилинганди.
Жаҳонгир Қўзиев
