АҚШ ва Эрон бир неча ҳафта ичида ядро келишувига эришиши мумкин. Бу ҳақда Bloomberg агентлиги ўз манбаларига таяниб хабар берди.
Унинг маълумотларига кўра, Вашингтон ва Теҳрон “тарихий ядро келишуви”нинг тикланиши учун қатор муҳим масалаларни ҳал қилишга тайёр. Гап Эроннинг ўтмишдаги ядро фаолиятини текширишга рухсат бериш, шунингдек, Вашингтон келишувни яна тарк этган тақдирда иқтисодий кафолатлар бўлиши ҳақида кетмоқда. Агентлик суҳбатдошлари бунга бир неча ҳафта кетишини айтган.
Маълумот ўрнида: 2015 йилда Эрон ва АҚШ, Буюк Британия, Германия, Франция, Россия ҳамда Хитой ўртасида “Ҳамкорликдаги умумий ҳаракатлар режаси” имзоланган. Унга кўра, Теҳрон ядро қуроли ишлаб чиқишдан воз кечиши, Ғарб эса иқтисодий санкцияларни бекор қилиши лозим эди. Аммо 2018 йилда АҚШ бу келишувдан чиқиб кетди.
Жозеф Байден АҚШ президентига айлангач, келишувни қайтиб тиклаш ташаббуси билан чиқди. 2021 йилдан бошлаб Венада саккиз раундли музокаралар ўтказилди. 11 март куни томонлар ташқи факторлар туфайли танаффус олди. Унга асосий сабаб қилиб Россиянинг Украинадаги ҳарбий операцияси кўрсатилмоқда. Бунга қадар музокаралар финал босқичига чиққан ва февраль охирида якунланиши керак эди. Сўнгги ойларда Европа воситачилигида ядро келишуви бўйича музокаралар фаоллашди.
Аввалроқ АҚШ Эронга ядро шартномаси бўйича жавоб таклифларини жўнатганди.