Грузия бош вазири Михаил Саакашвили агар Грузияга қайтса, тезда қамоққа олинишини айтди
Қайд этилишича, Грузия бош вазири Ираклий Гарибашвили мамлакатнинг собиқ президенти Михаил Саакашвили Грузия ҳудудига қадам қўйган заҳоти ҳибсга олинишини айтди. Бу ҳақда «ТАСС» хабар берди.
Маълум қилинишича, собиқ президент 2 октябрь куни маҳаллий сайловлар учун Грузияга қайтмоқчи бўлган.
Гарибашвили Михаил Саакашвили тўғрисида ўзининг қатъий фикрини қуйидагича изоҳлаган:
“Саакашвили бизнинг еримизга, ҳудудимизга қадам босиши билан, тезда ҳибсга олинади ва қамоққа ташланади. Бу жараёнга аралашган ҳар бир киши қонун доирасида энг қаттиқ тарзда жазоланади”.
Шу билан бирга, у Саакашвилининг мамлакатга келишдан мақсади ҳокимиятни қайта қўлга киритиш эканига ишонч билдирган ва ҳозирги вазият 2003 йилда собиқ президент ўз шериклари билан Грузияда “атиргул инқилоби”ни уюштириб, ҳокимиятни эгаллагани каби эмаслигини айтган.
“Саакашвилининг ягона вазифаси ва мақсади мамлакатимизда тартибсизликлар, беқарорлик ва бетартибликни келтириб чиқариш. Унинг ягона истаги эса ҳокимиятни қўлга олиш. Бу Саакашвили ва унинг жамоаси учун амалга ошмайдиган орзу. Бугун давлат кучли, Михо ва унинг тўдаси бу 2003 йил, деб ўйламасин. Ҳар ким ҳар қандай провокация учун қатъий жавоб беради, албатта, қонун доирасида”, — дея хулоса қилган Гарибашвили .
Маълумот ўрнида: Саакашвили 2 октябрь тунда Тбилисига учиш учун самолёт чиптасини сотиб олганини айтган. Кейинчалик тармоқда чиптанинг фотосуратлари пайдо бўлган, унда собиқ президент онаси Гиули Аласания билан Грузияга келиши маълум бўлган.
Бундан аввал Грузия ҳукумати чекловларни қайта тиклагани, Баҳром Ашрафхонов Ўзбекистоннинг Грузиядаги элчиси бўлгани ҳамда грузиялик параатлет Токиодан бадарға қилингани айтилганди.
Чўлпоной Аҳмедова
