Ҳокимлар ҳам сайловда фаол иштирок этишди
Сайловолди жараёнлари қизғин паллага кирди.
Тошкент шаҳар ҳокими Жаҳонгир Ортиқхўжаев Шайхонтоҳур тумани "Зафаробод" маҳалласида ташкил этилган 410-сайлов участкасида овоз бериб, президент сайловида иштирок этди.
Тошкент вилояти ҳокими Даврон Ҳидоятов Нурафшон шаҳридаги Давлат хизматлари маркази биносида ташкил этилган 10-сайлов участкасига оила аъзолари билан келиб, ўзи муносиб деб билган номзодга овоз берди.
Самарқанд вилояти ҳокими Эркинжон Турдимов вилоятнинг иккинчи ва тўртинчи сектор раҳбарлари билан бирга Самарқанд шаҳридаги 144-сайлов участкасида биринчилар қаторида овоз берди.
Қашқадарё вилояти ҳокими Зойир Мирзаев ҳам мазкур участкага бориб биринчилар қаторида овоз берди.
Фарғона вилояти ҳокими сектор раҳбарлари билан биргаликда Фарғона шаҳри Шодиёна маҳалласидаги "Ишга марҳамат" мономарказида ташкил этилган 88-сайлов участкасида овоз берди.
Сурхондарё вилояти ҳокими Тўра Боболов ҳам биринчилардан бўлиб мамлакатимиз тараққиёти, тинч, осуда ҳаёт ва буюк келажак учун овоз берди.
Ўзбекистон Республикаси Президенти сайлови Навоий вилоятида ҳам кўтаринкилик ва фаоллик билан давом этмоқда. Вилоят ҳокими Қобул Турсунов отаси ва оила аъзолари билан биргаликда Кармана туманидаги 64-сайлов участкасига ташриф буюриб, ўзи муносиб деб билган номзодга овоз берди.
Хоразм вилояти ҳокими Фарҳод Эрманов ва бошқа сектор раҳбарлари Урганч шаҳридаги 28-сайлов участкасида овоз берди.
Бухоро вилояти ҳокими Ботир Зарипов Бухоро шаҳридаги 49-сайлов участкасида Сайлов кодексида белгиланган талаблар асосида ўзи муносиб деб топган номзодга овоз берди.
Ўзбекистон Республикаси Президенти сайлови Жиззах вилоятида ҳам қизғин давом этмоқда. Вилоят ҳокими Эргаш Солиев Ўзбекистоннинг келажаги учун овоз берди.
Қорақалпоғистон Республикаси Жӯқорғи Кенгеси Раиси М.Камалов сектор раҳбарлари билан биргаликда Нукус шаҳри Сарбиноз маҳалла фуқаролар йиғинидаги транспорт техникуми биносида ташкил этилган 20-сайлов участкасида овоз берди.
Маълумот учун: ЕХҲТ парламентлар ассамблеяси кузатувчилари Ўзбекистон Президенти сайловига юқори баҳо берди.
Эслатиб ўтамиз, Ўзбекистон Республикаси Президенти сайловида Ўзбекистон Либерал-демократик партиясидан кўрсатилган номзод Шавкат Мирзиёев Мирзо Улуғбек тумани Алишер Навоий маҳалласидаги 59-сайлов участкасига ташриф буюриб, овоз бериш жараёнида иштирок этганди.
Бундан аввал Ўзбекистон Экологик партиясидан президентликка номзод Нарзулло Обломуродов, "Миллий тикланиш" демократик партиясидан президентликка номзод Алишер Қодиров, Ўзбекистон "Адолат" социал-демократик партиясидан президентликка номзод Баҳром Абдуҳалимов ҳамда Халқ демократик партиясидан кўрсатилган номзод Мақсуда Ворисова Учтепа тумани 116-мактабдаги 206-сайлов участкасида овоз бергани ҳақида хабар берган эдик.
Шунингдек, сайловчиларнинг умумий сони 21,2 миллион нафардан ошгани, спортчиларимиз сайловда фаол қатнашгани ҳамда 126 ёшли Хувайдо момо ўзи танлаган муносиб номзодга овоз бергани ҳақида хабар берилганди.
