Маст йигит пул бермагани учун ҳайдовчини ўлдирган

 

Бу ҳақда Олий суд матбуот хизмати хабар берди.

 

Воқеа Тошкент вилоятида содир бўлган.  М.Д. исмли йигит «Cobalt» автомашинаси ҳайдовчиси А.К. билан Фарғона вилоятига боришга келишган.

 

Машина Тошкент–Фарғона йўналиши бўйлаб кетаётган вақт йигит Оҳангарон шаҳрида яшовчи танишидан буюм олиши кераклигини айтиб, ҳайдовчини Ангрен дарёси яқинига бошлаб борган. Шундан сўнг машинани тўхтатишни сўраб, кутилмаганда темир бўлаги билан А.К.нинг бош қисмига бир нечта зарба берган.

 

Кейин оғир жароҳатланган А.К.нинг чўнтагидаги 325 минг сўм пул ва Samsung A3 русумли уяли телефонини тортиб олган. Таҳдид билан қолган пулни қаерга яширганини сўраган. Жабрланувчи бошқа пули йўқлигини айтганидан сўнг йигит унинг бошига яна уриб, ўлдирган.

 

М.Д. жиноятини яшириш мақсадида ҳайдовчининг жасадини чакалакзор ичига ташлаган. Шундан сўнг автомашинани Ангрен дарёси бўйига ҳайдаб келиб, юкхона ва машина ташқи томонидаги қон доғини, ҳамда бармоқ изларини ювган. Кейин автомашинани ўзи вақтинча яшаб келаётган кўча бошига ташлаб кетган.

 

Бу жиноят 2020 йилнинг 5 январь санасида содир бўлганига қарамай, 2021 йилда жиноятчи қўлга олиниб, ҳукм ўқилди.

 

Келтирилишича, унга нисбатан 19 йил муддатга озодликдан маҳрум қилиш жазоси тайинлаган.

 

Аввалроқ, Қашқадарёда сомон талашиб поччасини ўлдириб қўйган шахс 18 йилга қамалгани ҳақида хабар бергандик. 

 

 

Мафтуна Режаббоева