Ота фарзанди учун салкам 370 миллион сўм алимент тўлади
Маълумки, вояга етмаган фарзандини моддий ва маънавий томондан таъминлаш, тарбиялаш ҳар бир ота-онанинг бурчи. Аммо айрим тушунмовчиликлар, жанжаллар натижасида ажримлар сони кўпайиб, оқибатда, норасида гўдакларнинг кўнгли кемтик бўлиб ўсмоқда.
Қайд этилишича, Самарқанд вилояти Нарпай туманида ўз оталик бурчини унутмаган Рустам Ҳусанов фарзандини моддий қўллаб-қувватлаган ҳолда, бир нафар фарзанди учун қарийиб 370 миллион сўмлик алимент пулини бир йўла тўлаб берди.
Фуқаролик ишлари бўйича Каттақўрғон туманлараро судининг 2020 йил 12 августдаги қарорига мувофиқ қарздор Рустам Ҳусановдан собиқ турмуш ўртоғи Фотима Қиличованинг фойдасига бир нафар фарзандининг моддий таъминоти учун алимент тўлови ундириб берилди, нотариус томонидан ҳужжатлаштирилди.
Эслатиб ўтамиз, аввалроқ алимент тўламаган 11 нафар ота қамоққа олингани ва 5 нафар болага алимент тўлашдан бош тортган отага нисбатан жиноят иши очилгани ҳақида хабар берилганди.
Чўлпоной Аҳмедова
