"Ўзимизни кўчаларда бир йилдан буён автомобиль бошқараман" — Жиззахда 13 ёшли бола "Lacetti" бошқариб кетаётгани аниқланди
Жиззах вилоятида "Lacetti" автомашинасини 7-синф ўқувчиси бошқариб кетаётгани аниқланди. Бу ҳақда ЙҲХББ хабар берди.
Қайд этилишича, Жиззах вилояти, Зомин туманида ЙПХ ходимлари томонидан Lacetti тўхтатилганда, рул бошқарувидан 13 ёшли, 7-синфда ўқийдиган бола тушиб келган.
Автомобиль салонида ушбу боланинг укаси ва синглиси ҳам бирга экани аниқланган. ЙПХ ходими «Ота-онангизнинг хабари борми автомобиль бошқарганингиз ҳақида?» – деб берган саволига бола «Ҳа, хабарлари бор, ўзимизни кўчада бир йилдан бери бошқариб юраман» — дея жавоб қайтарган.
Мазкур ҳолат юзасидан тегишли ҳужжатлар расмийлаштирилиб, автомобиль вақтинча сақлаш учун жарима майдонига жойлаштирилган.
Аввалроқ Андижон вилоятининг Андижон туманида 16 ёшли фуқаро иштирокида содир бўлган ЙТҲ оқибатида ҳайдовчининг 13 ёшли укаси оғир тан жароҳати олиб, шифохонада вафот этгани ҳақида хабар берилганди.
