Пулга ўралган оғу
Маълумотларга кўра, гиёҳвандликка ружу қўйган ёшларнинг акасариятини 30 ёшгача бўлганлар ташкил этади. Тошкент шаҳрида жиноятчиликнинг олдини олишга қаратилган тадбирлар давомида аниқланаётган жиноятлар ҳам асосан ёшлар томонидан содир этилаётганига гувоҳ бўлиш мумкин.
Хусусан, 25 августдан 26 августга ўтар кечаси ўтказилган тезкор тадбирларда 3 та ҳолатда гиёҳвандлик моддаси ва психотроп дори воситалари олиб юрилиши аниқланди.
Тунги соат 00:30 ларда Тошкент вилояти ҳудудидан, Тошкент шаҳрига кириб келаётган, “Cobalt” русумли, давлат рақами 30 Q 577 MA бўлган автоулов Пост патруль хизмати ходимларида шубха уйғотди. Автоулов тўхтатилиб, текширилганда иштихонлик ҳайдовчи Ғ.Бекназаровнинг чўнтагидан 1000 сўмлик пул купюрасига ўралган, истеъмол учун тайёр бўлган гиёҳванд моддаси топилди.
Мазкур ҳолат юзасидан тегишли ҳужжатлар расмийлаштирилиб, Ғ.Бекназаров Чилонзор тумани ИИО ФМБга топширилди.
Худди шунгай ҳолат Яккасарой туманида ҳам аниқланди. 29 ёшли С.Фазлиддинов бошқарувидаги “Spark” русумли, давлат рақами 01 Х 271 WA бўлган автоулов тўхтатилиб, текширилганда 1000 сўмлик пул купюрасига ўралган, истеъмол учун тайёр бўлган гиёҳванд моддаси топилди.
Мазкур ҳолат юзасидан тегишли ҳужжатлар расмийлаштирилди. Ҳайдовчи Яккасарой тумани ИИО ФМБ 2-ИИБга топширилди.
Тадбир давомида автоуловлардан психотроп воситалар ҳам аниқланди. Масалан, А.Темур кўчаси бўйлаб ҳаракатланиб келаётган, 1989 йилда туғилган, Ё.Газиев бошқарувидаги “Damas” русумли, давлат рақами 01 С 104 МВ бўлган автомобиль тўхтатилиб, кўздан кечирилди. Шубҳа остига олинган ушбу ҳайдовчи текширилганда чўнтагидан ва машина салонидан бир донадан “Тропикамид” ва “Регапен” дорилар ҳамда 1 дона пичоқ топилди.
Мазкур ҳолат юзасидан тегишли хужжатлар расмийлаштирилиб, ҳайдовчи тегишли органларга топширилган.
Шунингдек тадбир давомида маст ҳолда автомашина бошқарган 19, тегишли ҳужжатларсиз 109, қонуний талабларни бажармаган 14 ва 5 нафар овоз сўндиргич (глушитель) ўрнатган, машина ойналарини тегишли рухсатномасиз қорайтириб, автоулов бошқарган 6 нафар хайдовчи аниқланди. Уларга нисбатан қонуний чора кўрилди.
Аввалроқ Яккасаройда ўтказилган тунги рейдда “Lacetti” салонидан гиёҳвандлик моддаси топилгани ҳақида хабар берилганди.
Муножат Валиева тайёрлади.
