Маълумки, тезлик билан боғлиқ қоидабузарликлар автомобиль йўлларида ўрнатилган махсус тезликни ўлчаш ускуналари воситасида аниқланмоқда. Бу эса, табиийки, айрим ашаддий қоидабузарлар, аниқроғи автомоблни тез ҳайдайдиган ишқибозларга ёқмайди.
Тошкент вилояти ички ишлар бош бошқармаси йўл ҳаракати хавфсизлиги бошқармаси тасарруфида бўлган ана шундай махсус транспорт воситаларидан бири М39 халқаро автомобиль йўлининг Зангиота тумани ҳудудидан ўтган қисмида иш олиб бораётган эди. Бу афтидан шу ердан ўтиб кетаётган ҳайдовчи Музаффар Раҳмоновга ёқмайди. У ўз шахсий “Cobalt” русумли машинасини тўғри унинг олдида тўхтатиб, ушбу ҳолатни қўл телефонига тасвирга ола бошлайди.
Йўл патруль хизмати инспектори ундан ишга ҳалақит бермасликни сўрайди. Аммо у қайсарлик қилиб, талабни бажармайди. Шундан сўнг инспектор ички ишлар бошқармасидан ёрдамчи куч чақиради. Улар ҳайдовчини ички ишлар идорасига олиб кетади. Керакли ҳужжатларни тайёрлаб, ишни судга чиқаради.
Жиноят ишлари бўйича Зангиота туман судида тўпланган ҳужжатлар, гувоҳлар кўрсатмалари атрофлича ўрганилиб, Музаффар Раҳмоновга Маъмурий жавобгарлик тўғрисидаги кодексининг 183 моддаси билан 15 сутка маъмурий қамоқ жазоси тайинланди. Базавий ҳисоблашнинг бир баравари, яъни 245 минг сўм миқдорида жарима белгиланди.
Аввалроқ Олмазор туманида жойлашган “Минерал сувлар” блок-постида тақиқланган гиёҳванд моддаси ушлаб қолингани хақида хабар берган эдик.
Муножат Валиева