Маълум бўлишича, 19 сентябрь куни Тошкент шаҳар ИИББга маиший техника ишлаб чиқарувчи компаниялардан бирининг ходимлари мурожаат қилиб, компания савдо белгиси остида сохта Telegram-бот' ташкил этилгани бўйича ариза берган.

 

Қайд этилишича, сохта каналда обуначилар сони қисқа муддатда 400 мингдан ортиб, унда ўтказилаётган ёлғон хайрия акцияси сабаб компания call-марказига "гуруҳингиз орқали совринга эга бўлдим, шуни беришингизни сўрайман" мазмунидаги мурожаатлар сони кундан-кунга ортиб борган.

 

Бунинг оқибатида компания обрўсига путур етказилган, шунингдек, компания маҳсулотларини сотиб олган истеъмолчиларнинг саволларига жавоб бериш, уларнинг таклиф ва шикоятларини қабул қилиш билан шуғулланадиган call-марказга юклама ортишига сабаб бўлган.

 

Таъкидланишича, мазкур мурожаат юзасидан Тошкент шаҳар ИИББ ахборот технологиялари соҳасидаги жиноятларга қарши курашиш бўлими томонидан тузилган ишчи гуруҳ томонидан олиб борилган тезкор тадбирлар давомида Telegram' тармоғида сохта гуруҳлар ташкил этиб, одамларни алдаётганлар ушланган.

 

"Қўлга олинганларнинг икки нафари Фарғона вилоятидан бўлган вояга етмаган шахслар эканлиги аниқланган. Улар гуруҳга катта миқдорда одам тўплаб, сўнг уни сотишни мақсад қилган", — дейилади хабарда.

 

Эслатиб ўтамиз, аввалроқ Telegram' ижтимоий тармоғидаги ютуқли ўйинлар орқали бухоролик фуқарони чув туширган фарғоналик йигит ушлангани, Самарқандда 16 минг АҚШ долларини букмеккерлик сайтида ютқазиб юборган фирибгар аниқлангани ҳамда Андижонда виртуал фирибгар қўлга олингани ҳақида хабар берилганди.