Тошкентда ўқувчилар ўртасида оммавий жанжал юз берди
Ижтимоий тармоқларда бир нечта мактаб ўқувчиларининг ўзаро жанжаллашаётганлиги акс этган видео тарқалди.
Ушбу ҳолат юзасидан Тошкент шаҳар Ички ишлар бош бошқармаси матбуот хизмати хабар берди.
Унда айтилишча, жорий йилнинг 28 сентябрь куни 94-сонли умумий ўрта таълим мактабининг 9 ва 10-синф ўқувчилари ва 145-сонли умумий ўрта таълим мактабининг 9-синф ўқувчилари Telegram' ижтимоий тармоғи орқали ўзаро гап талашиб қолишган. Сўнг улар шу куни тахминан соат 13:20 ларда Тошкент шаҳар Миробод тумани "Амир Темур" кўчасида учрашиб муносабатларни ҳал қилишмоқчи бўлишган. Мазкур учрашувга 20 нафарга яқин мактаб ўқувчилари келишган ва уларнинг бир нечтаси ўртасида жанжал бошланган.
Ҳолатдан хабар топган ҳудудий профилактика инспекторлари А.Йўлдашбеков ва Т.Исамухамедовлар зудлик билан воқеа жойига етиб келишган ва уларнинг аралашуви билан катта можаронинг олди олинган. Ҳозирда мазкур ҳолат юзасидан Тошкент шаҳар ИИББ томонидан текширув ўтказилмоқда. Натижаси бўйича қонуний қарор қабул қилинади.
Аввалроқ Фарғонада икки гуруҳ иштирокидаги жанжал тўхтатиб қолинганди. Шунингдек, Қаршида бир гуруҳ ёшлар ўртасида оммавий жанжал бўлганди.
Муножат Валиева
