Украина НАТО аъзосига айланадими?
Альянс бош котиби жавоб берди.
НАТО бош котиби Йенс Столтенбергнинг сўзларига кўра, альянсга Украинани қабул қилиш бўйича ташкилот аъзолари якдил фикрга эга эмас. Бу ҳақда "РИА Новости" хабар берди.
"Улар (Украина) ҳозирча альянс аъзоси эмас. Аммо биз Киев билан ҳамкорликни кучайтирдик, улар билан кўпроқ ишлаяпмиз. НАТО аъзоси бўлиш учун НАТО стандартларига жавоб бериш керак. Биз уларга коррупцияга қарши курашда ёрдам беряпмиз. Аммо Украинанинг альянсга тўлақонли аъзо бўлиши учун НАТО'даги барча 30 давлат ягона консенсусга келиши лозим", — деган Столтенберг.
Шунингдек, альянс бош котиби Украина президенти Владимир Зеленский билан учрашувда мамлакат "суверенитети ва ҳудудий яхлитлиги"ни қўллаб қувватлашини маълум қилган. Аммо Столтенбергнинг сўзларига кўра, Зеленский кўпроқ нарсани — НАТОнинг тўлақонли аъзосига айланишни хоҳлайди.
Аввалроқ Туркия Украина ва Грузиянинг НАТО'га интилишини қўллаб қувватлашини маълум қилганди. Шунингдек, Путин президентлиги бошида Россияни НАТО аъзосига айлантиришни истагани ҳақида хабар қилинганди.
Жаҳонгир Қўзиев
