"Tolibon"dan intervyu olgan jurnalist ayol harakatdan qo‘rqqani bois Afg‘onistonni tark etdi
Afg‘onistonlik jurnalist Beheshta Argand “Tolibon”dan qo‘rqqani sababli mamlakatni tark etdi.
Beheshta Argand TOLO newsda ishlagan. 15 avgust kuni “Tolibon” hukumatni egallagandan so‘ng harakat vakillaridan hisoblangan Abdul Haq Hamad bilan to‘g‘ridan-to‘g‘ri intervyu olib borgan. Bu esa jahon hamjamiyatining diqqatini tortgandi.
Jurnalist CNNga mamlakatni tark etgani haqidagi maʼlumotni tasdiqlagan. Xususan, WhatsApp tarmog‘i orqali,
"Men mamlakatni tark etdim, sababi millionlab insonlar qatori men ham ‘Tolibon‘dan qo‘rqaman", -deya maʼlum qilgan.
Shuningdek, Afg‘onistonning ikki ayol uchuvchisidan biri Safiya Feruziy ham tark etgan. Feruziy toliblar tomonidan toshbo‘ron qilingani xabar qilingan edi, ammo keyinchalik Qatarda ekanligi maʼlum bo‘ldi.
“Tolibon” 17 avgust kuni bergan matbuot anjumanida ayollar huquqini himoya qilishga vaʼda bergan. Ammo shundan keyin ayollarning ishga kelishi taqiqlandi. Shuningdek, dastlab harakat ayollarning taʼlim olishiga to‘sqinlik qilmasligi maʼlum qilgan. Lekn keyinchalik Badaxshon viloyatida 6 sinfni bitirgan qizlarga taʼlim olish taqiqlab qo‘yildi.
Eslatib o‘tamiz, AQSH qo‘shinlari olib chiqib ketilishi ortidan toliblar Afg‘onistonda faollashdi. 15 avgust kuni Kobulning “Tolibon” tomonidan egallanishi Afg‘onistondan ko‘plab ayollarni ham tark etishga majbur bo‘ldi. Hozirda birgina AQSH 100 ming afg‘onistonliklarni evakuatsiya qilgani aytilmoqda.
Jahongir Qo‘ziyev
