“Kia Uzbekistan” “K8” sedanini sotishni boshladi
Bu haqda “Spot.uz” xabar berdi.
Unda aytilishicha, kompaniya yettita modelni namoyish qilgan. Ular — “Seltos”, “K5”, “Sorento”, “Soul”, “Stinger”, “Carnival” va “K8”.
Taʼkidlash kerakki, “Kia Uzbekistan” mazkur modellarni 2022-yilga reja qilayotgan edi. Bularning bozori chaqqoni “K8” sedani hisoblanadi.
Kompaniya O‘zbekiston bozoriga 2020-yil oktabr oyidan jadal kirib kelishni boshlagan. O‘shanda avtomobil ishqibozlariga asosan “Seltos” va “K5” modellar taqdim qilingan. Shundan so‘ng iyun oyidan boshlab “Sorento” va “Soul”, avgust oyiga kelib yana ikkita model — “Stinger” va “Carnival” sotuvga qo‘yilgan.
Shunday qilib, kompaniya hozirda O‘zbekistonda yettita avtomobil modelini namoyish etadi. Ularning ichida bozori chaqqon deyilayotgani – “K8” sedani bo‘lib, 586,9 million so‘mdan boshlanadi.
“Kia” kompaniyasi O‘zbekistonda avtomobillarni yig‘ishni 2020-yilning kuzida boshlagan. Jizzaxdagi ishlab chiqarish liniyasi “Kia” kompaniyasining Rossiyadagi bosh shtabi nazorati ostida tashkil etilgan.
Avtomobillar Jizzax zavodida SKD usulida (avtomobilni yig‘ish) ishlab chiqariladi va zavodning ishlab chiqarish quvvati yiliga 25 ming avtomobilni o‘z ichiga oladi.
Kompaniya 2022-yil oxiriga borib, SKD usulida ishlab chiqarish quvvatini 100 mingtaga yetkazishni rejalashtirmoqda.
Bundan avval O‘zbekistonda “LADA Vesta CW” va “LADA XRAY” rusumli avtomobillar ishlab chiqarila boshlangani, “UzAuto Motors” yangi “Chevrolet Captiva” sotishni boshlagani hamda “Tesla” avtomobili tezlik bo‘yicha rekordni yangilagani haqida xabar berilgandi.
Olamgir Abdiyev
