Tadbirkorga koʻp qavatli uy qurilishini olib berishni vaʼda qilgan firibgarlar ushlandi
Bosh prokuratura huzuridagi Departament hamda DXXning Sirdaryo viloyati boshqarmalari tomonidan tadbirkorlik subyektlarining huquqlarini himoya qilish yuzasidan tezkor tadbir oʻtkazildi.
Tekshiruvda muqaddam firibgarlik jinoyati uchun sudlangan fuqaro R.R. “A.R.” MCHJ rahbarining ishonchiga kirib, unga Jizzax viloyati Zafarobod tumanida koʻp qavatli uylar qurilishi rejalashtirilganligini aytgan. Shundan 5 qavatli 1 ta uy qurish uchun shartnoma tuzishda tanishlari orqali yordam berishini vaʼda qilgan. Buning evaziga esa undan firibgarlik yoʻli bilan 5 000 AQSH dollarini olgan vaqtida ashyoviy dalillar bilan ushlandi.
Hozirda holat yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishi qoʻzgʻatilib, tergov harakatlari olib borilmoqda.
Eslatib oʻtamiz, bundan avval zaxiradagi yer maydonini sotmoqchi boʻlgan firibgar ushlangani va Boʻstonliq tumanida 5 gektar yerni 150 ming AQSH dollariga olib berishni vaʼda qilgan shaxs qoʻlga olingani haqida xabar berilgandi.
Shuningdek, Jarqoʻrgʻon tumanida zaxiradagi yerni sotmoqchi boʻlgan firibgarga jazo qoʻllanilgandi.
Choʻlponoy Ahmedova
