Radarlarni o‘rnatish vakolati faqatgina Ichki ishlar vazirligida bo‘lishi kerak — Alisher Qodirov
Alisher Qodirov radarlardan maqsad pul undirish emas, yo‘lda tartibni saqlash bo‘lishi kerakligini aytdi.
“Milliy tiklanish” demokratik partiyasi raisi Alisher Qodirov yo‘llardagi radarlarni tadbirkorlar bilan hamkorlikda o‘rnatish amaliyoti o‘zini oqlamaganini bildirdi.
Uning aytishicha, tezlikni nazorat qilishdan asosiy maqsad jarima orqali pul undirish emas, balki yo‘l-transport hodisalarining oldini olish va yo‘llarda tartibni saqlash bo‘lishi kerak.
Qodirov Ichki ishlar vazirligiga radarlarni tadbirkorlar bilan hamkorlikda o‘rnatish samaradorligi yuzasidan so‘rov yuborilganini, biroq unga javoban asosiy masala sifatida byudjetga qancha mablag‘ undirilgani qo‘yilganini qayd etdi.
“Bu ishga bunday yondashmaslik kerak. Chunki maqsad pul undirish bo‘lishi kerak emas. Ichki ishlar vazirligining maqsadi yo‘l-transport hodisalarining oldini olish, yo‘lda tartibni saqlash bo‘lishi kerak”, — dedi u.
Deputatning ta’kidlashicha, radarlar bo‘yicha haydovchilarning e’tirozlari ko‘paymoqda. Uning fikricha, tadbirkorlarning asosiy maqsadi daromad topish bo‘lgani sababli, ayrim holatlarda haydovchilarni huquqbuzarlikka undovchi vaziyatlar yuzaga kelmoqda.
Shuningdek, Qodirov transport hodisalarining oldini olish uchun radarlarni o‘rnatish vakolati faqat Ichki ishlar vazirligida bo‘lishi kerakligini bildirib, bu masalada xususiy sektor bilan hamkorlik kutilgan natijani bermaganini aytdi.
Avvalroq Oliy Majlis Qonunchilik palatasi deputati Davron Aripov ham yo‘l harakati qoidabuzarliklarini qayd etuvchi radarlarning xususiy sektor qo‘liga o‘tib, ular hozirda daromad manbayiga aylanib qolganini aytgandi.
