O‘zbekistonda yana sel-suv toshqini xavfi e’lon qilindi
Ayrim hududlarda kuchli yomg‘ir sabab yomg‘ir suvlari to‘planishi va hududlarni suv bosishi ehtimoli ham mavjudligi qayd etilgan.
O‘zgidromet 26-maydan 1-iyunga qadar respublikaning tog‘oldi va tog‘li hududlarida sel-suv toshqini xavfi mavjudligi haqida ogohlantirdi.
Ma’lum qilinishicha, kutilayotgan yomg‘irlar sabab ayrim hududlarda sel kelishi, soy va kichik daryolarda suv sathi keskin ko‘tarilishi mumkin.
Sel-suv toshqini xavfi quyidagi hududlarda kuzatilishi ehtimoli mavjud:
— Qashqadaryo viloyatining Yakkabog‘, Dehqonobod, Chiroqchi, Kitob, Shahrisabz, Qamashi va G‘uzor tumanlarida;
— Surxondaryo viloyatining Sariosiyo, Uzun, Oltinsoy, Denov, Boysun, Sherobod, Sho‘rchi, Qumqo‘rg‘on va Muzrobot tumanlarida;
— Samarqand viloyatining Urgut, Samarqand, Bulung‘ur, Nurobod, Qo‘shrabot, Kattaqo‘rg‘on, Payariq, Jomboy va Ishtixon tumanlarida;
— Navoiy viloyatining Xatirchi, Navbahor, Nurota, Konimex va Karmana tumanlarida;
— Jizzax viloyatining Zomin, Baxmal, G‘allaorol, Sharof Rashidov, Forish va Yangiobod tumanlarida;
— Toshkent viloyatining Ohangaron, Bo‘stonliq, Parkent, Piskent, O‘rta Chirchiq va Yuqori Chirchiq tumanlari, shuningdek Angren hamda Olmaliq shaharlarida;
— Namangan viloyatining Pop, Kosonsoy, Chortoq, Chust, Namangan va Yangiqo‘rg‘on tumanlarida;
— Farg‘ona viloyatining So‘x, Shohimardon, Farg‘ona va Beshariq tumanlarida;
— Andijon viloyatining Andijon, Asaka, Jalaquduq, Qo‘rg‘ontepa, Paxtaobod, Izboskan, Xo‘jaobod, Marhamat tumanlari hamda Xonobod shahrida.
“O‘zgidromet” tog‘oldi va tog‘li hududlarda yashovchi fuqarolar, dam oluvchilar hamda ushbu hududlarda harakatlanuvchi haydovchilarni ehtiyotkorlik choralarini ko‘rishga chaqirdi.
Shuningdek, ayrim hududlarda kuchli yomg‘ir sabab yomg‘ir suvlari to‘planishi va hududlarni suv bosishi ehtimoli ham mavjudligi qayd etilgan.
Eslatib o‘tamiz, 19-may kuni Namangan viloyati, Jizzax viloyati hamda Qashqadaryo viloyatining ayrim hududlarida sel kuzatilgan edi. Xususan, Qashqadaryoning Dehqonobod tumanidagi G‘injak qishlog‘ida yuz bergan sel oqibatida adirda mol boqib yurgan 25 yoshli yigit halok bo‘lgan.
Shuningdek, 21-may kuni Jizzax, Toshkent, Qashqadaryo, Navoiy, Surxondaryo va Samarqand viloyatlarining ayrim hududlarida sel va yomg‘ir suvlari oqimi qayd etilgan. Navoiy viloyatidagi sel oqibatida to‘rtta avtomobil hamda bir nechta uy zarar ko‘rgan.
22–24 may kunlari esa Surxondaryo, Qashqadaryo, Jizzax va Namangan viloyatlarida yana sel hodisalari kuzatilgan edi. 22-may kuni Qamchiq dovonida yo‘lga loy va tosh aralash sel suvlari tushgani sabab avtomobillar harakati vaqtincha cheklangani xabar qilingan edi.
