Eronda Ali Xomanaiyning dafn marosimiga tayyorgarlik boshlandi
Urush sabab bir necha oyga kechiktirilgan marosim sanasi hozircha e’lon qilinmagan.
Eron hukumati halok bo‘lgan oliy rahbar Oyatulloh Ali Xomanaiy uchun “ulug‘vor” dafn marosimini o‘tkazish bo‘yicha tayyorgarlik ishlarini boshladi. Al-Arabiya yozishicha, bu haqda davlat televideniyesi Islom targ‘iboti bo‘yicha Tehron muvofiqlashtirish kengashi rahbari Mohsen Mahmudiyga tayanib xabar berdi.
Mahmudiyning so‘zlariga ko‘ra, dafn marosimini tashkil etish uchun maxsus shtab tuzilgan bo‘lib, hozirda turli davlat idoralari marosimni rejalashtirish va tashkiliy masalalarni muvofiqlashtirish bilan shug‘ullanmoqda. Marosimning aniq sanasi hozircha ma’lum qilinmagan.
Ali Xomanaiy Eron Islom Respublikasiga 30 yildan ortiq rahbarlik qilgan. U 28-fevral kuni AQSH va Isroil tomonidan amalga oshirilgan hamda urush boshlanishiga sabab bo‘lgan zarbalarning ilk to‘lqinida halok bo‘lgan edi.
Hujumlar vaqtida uning o‘g‘li va vorisi Mujtabo Xomanaiy ham yaralangan. U oliy rahbar lavozimini egallaganidan buyon omma oldida ko‘rinish bermagan.
Aprel oyida Ali Xomanaiy xotirasiga bag‘ishlangan alohida tadbir o‘tkazilgan bo‘lsa-da, dastlab rejalashtirilgan davlat dafn marosimi urush tufayli o‘tkazilmagan.
Davlat televideniyesining xabar berishicha, hozirda turli tashkilotlar marosimni yuqori saviyada tashkil etish uchun zarur sharoitlarni yaratish ustida ishlamoqda. Rasmiy e’lon berilgach, marosim keng ko‘lamda o‘tkazilishi va unda ko‘plab fuqarolar ishtirok etishi kutilmoqda.
Avvalroq, AQSh va Eron o‘rtasida amalda bo‘lib turgan sulhni yana 60 kunga uzaytirish hamda urushni to‘liq yakunlash bo‘yicha muzokaralarni boshlash yuzasidan dastlabki kelishuvga erishilgani ma’lum qilingandi.
