AQSH Eronga qarshi yangi sanksiyalar joriy qildi
Yangi sanksiyalar Eronning moliyaviy tarmoqlari va Ali Ansoriy boshqaruvidagi aktivlar tizimini o'z ichiga oladi.
AQSH Moliya vazirligi Eronning moliyaviy tarmoqlari hamda ayrim jismoniy va yuridik shaxslariga nisbatan qo‘shimcha sanksiyalar joriy etilganini ma’lum qildi.
Vazirlik huzuridagi Xorijiy aktivlarni nazorat qilish boshqarmasi (OFAC) tomonidan e’lon qilingan yangi sanksiyalar ro‘yxatiga 14 nafar jismoniy va yuridik shaxs, jumladan, 8 nafar shaxs va 6 ta kompaniya kiritildi.
Sanksiyalar, xususan, eronlik moliyachi Ali Ansoriyga nisbatan qo‘llanilgan. AQSH Moliya vazirligi ma’lumotiga ko‘ra, u Eronning oliy rahbari Mojtaba Xomanaiy hamda mamlakat siyosiy elitasining manfaatlari yo‘lida faoliyat yurituvchi xalqaro aktivlar tarmog‘ini boshqargan. Shuningdek, Ansoriy davlat mablag‘larini o‘zlashtirish va ularni Eron tashqarisida noqonuniy maqsadlarda ishlatishda ayblanmoqda.
Bundan tashqari, Eron, Gonkong, Birlashgan Arab Amirliklari hamda Sent-Kits va Nevisda ro‘yxatdan o‘tgan bir qator kompaniyalar ham sanksiyalar ro‘yxatiga kiritilgan.
AQSH Moliya vazirligi bayonotiga ko‘ra, ushbu kompaniyalar sanksiya ostidagi Eron banklari nomidan har yili milliardlab dollar miqdoridagi mablag‘larni aylantirish, shuningdek, noqonuniy moliyaviy operatsiyalarni yashirish maqsadida qobiq kompaniyalar tarmog‘idan foydalangan.
Yangi cheklovlar Hormuz bo‘g‘ozi atrofidagi vaziyat keskinlashgan bir paytda joriy etilgan. Avvalroq AQSH Eronning Hormuz bo‘g‘ozidagi harakatlariga javoban mamlakat hududiga havo zarbalari berganini bildirgan edi. Shundan so‘ng Tehron Quvayt, Bahrayn va Iordaniyadagi AQSH harbiy obyektlariga zarbalar yo‘llagan.
