Электр қармоқ ёрдамида балиқ овлаётганлар ушланди
Улар бундай ноқонуний ҳамда шафқатсиз равишда балиқ овлагани учун маъмурий жавобгарликка тортилди. Бу ҳақда Сирдарё вилояти ИИБ ахборот хизмати хабар берди.
Унда айтилишича, вилоят Экология ва атроф-муҳитни муҳофаза қилиш идораси ўтказган тунги назорат тадбирида “У. Кубаев” СИУ ҳудудидан оқиб ўтган каналдан бир неча фуқаро томонидан ноқонуний равишда электр қармоқ ёрдамида балиқ овлаётганлик ҳолати аниқланган. Ҳолат юзасидан фуқароларга нисбатан маъмурий баённома расмийлаштирилган.
Сирдарё вилояти ИИБ ахборот хизмати Маъмурий жавобгарлик тўғрисидаги Кодекснинг 90-моддасига эътибор қаратган.
Мазкур моддада “Ов қилиш ва балиқ овлаш қоидаларини, шунингдек ҳайвонот дунёсидан фойдаланишнинг бошқа турларини амалга ошириш қоидаларини бузиш” фуқароларга базавий ҳисоблаш миқдорининг беш бараваридан ўн бараваригача, мансабдор шахсларга эса — ўн бараваридан ўн беш бараваригача миқдорда жарима тайинлашга сабаб бўлади. Шунингдек, агар ҳуқуқбузар электр қурол ёки шунга ўхшаш ашёлар билан ов қилган бўлса, унинг анжомлари мусодара қилиниб, базавий ҳисоблаш миқдорининг ўн бараваридан ўн беш бараваригача, мансабдор шахсларга эса — ўн беш бараваридан йигирма бараваригача миқдорда жарима ундириб олинади.
Ҳаракатнинг қамрови ва ҳолатига қараб, фуқаро уч йил муддатга ов қилиш ҳуқуқидан маҳрум этилади ёки базавий ҳисоблаш миқдорининг ўн беш бараваридан йигирма бараваригача, мансабдор шахсларга эса — йигирма бараваридан йигирма беш бараваригача миқдорда жарима солинади.
Бундан аввал Қорақалпоғистонда кийикларни ўлдириб, УАЗда олиб кетаётганлар ушлангани, Ўзбекистонда энди ҳайвонларга нисбатан шафқатсизлик жиноий жавобгарликка сабаб бўлиши ҳамда Айдар-Арнасой кўллар тизимида катта миқдордаги балиқларнинг ноқонуний овланишининг олди олингани ҳақида хабар берилганди.
Оламгир Абдиев
