Ўзбекистонда бюрократияга йўл қўйган 38 нафар амалдорга интизомий чора кўрилди

 

 

Қайд этилишича, вазирлик ва идоралар томонидан президентнинг тегишли фармони талаблари бузилганлиги, айрим тадбирлар ижроси таъминланмаганлиги аниқланди.

 

1 июндан 18 турдаги маълумот ва ҳужжатларни аҳоли ва тадбиркорлик субъектларидан талаб қилиш бекор қилинганига қарамай 3 256 та ҳолатда ҳужжатлар аҳолидан талаб қилинган.

 

Ўрганиш якунида аҳолидан ортиқча ҳужжатларни талаб қилган 9 та вазирлик ва идораларнинг раҳбар ходимлари МЖтК 2155-моддасига асосан маъмурий жавобгарликка тортилди:

 

– Бандлик ва меҳнат муносабатлари вазирлиги;
– Инновацион ривожланиш вазирлиги;
– Олий ва ўрта махсус таълим вазирлиги;
– Экология ва атроф-муҳитни муҳофаза қилиш давлат қўмитаси;
– Молия вазирлиги ҳузуридаги Давлат-хусусий шерикликни ривожлантириш агентлиги;
– Қишлоқ хўжалиги вазирлиги ҳузуридаги Боғдорчилик ва иссиқхона хўжалигини ривожлантириш агентлиги;
– Алкоголь ва тамаки бозорини тартибга солиш ҳамда виночиликни ривожлантириш агентлиги;
– Таълим сифатини назорат қилиш Давлат инспекцияси;
– Транспорт вазирлиги ҳузуридаги Йўл-қурилиш ишлари сифатини назорат қилиш инспекцияси.

 

Аниқланган қонун ҳужжатларининг бузилиши, уларнинг сабаблари ва бунга олиб келувчи шарт-шароитларни бартараф этиш тўғрисида вазирлик ва идораларга 21 та тақдимнома киритилган. Натижада, давлат органлари ва ташкилотларининг 38 нафар масъул ходимларига интизомий жазо чоралари қўлланилган.

 

"Адлия вазирлиги томонидан қонунчилик ҳужжатлари ва топшириқлардаги, шу жумладан, Президент ҳужжатларидаги ҳар бир топшириқ ва уларнинг назорат бандлари ижроси алоҳида назоратга олинган", — дейилади хабарда.

 

Аввалроқ Самарқанддаги айрим театр мансабдорларига жиноий иш қўзғатилгани, Қорақалпоғистонда транспорт вазири ва ҳоким ўринбосари жаримага тортилгани, Самарқанддаги давлат муассасаларида 563 миллион сўм бюджет маблағлари талон-торож қилингани аниқлангани ҳамда аҳолининг давлат хизматларидан фойдаланиш имкониятлари кенгайтирилгани ҳақида хабар берилганди.