Маҳаллаларда иш излаб қаерга мурожаат қилишини билмай “боши қотган” аёллар сони қачон қисқаради?

 

Ҳудудларда “Аёллар дафтари”га киритилган 250 минг нафар хотин-кизга ишга жойлашиш масаласида  Бандлик ва меҳнат муносабатлари вазирлиги томонидан амалий кўмак кўрсатилди. Аммо ҳали-ҳамон ён-атрофимизда иш излаб, қаерга мурожаат қилишини билмай юрган хотин-қизлар ҳам йўқ эмас.

 

Халқаро медиа-холлда ташкил этилган навбатдаги очиқ мулоқот аёллар бандлиги мавзусига бағишланди. Унда иштирок этган Бандлик ва меҳнат муносабатлари вазирлиги раҳбари Нозим Ҳусановнинг айтишича, бундай ҳолатларда аёллар вазирликка, жумладан, ташкилотнинг ижтимоий тармоқдаги саҳифаларига мурожаат қилишлари мумкин.

 

— Иш излаётган фуқаролар, шу жумладан, аёллар вазирликнинг (71) 200-06-00 ишонч телефонига ҳамда www.dmi.mehnat.uz сайтига ҳам бемалол мурожаат қилишлари мумкин. Бунда мурожаатчининг шахси сир сақланиши кафолатланади, — дейди Нозим Ҳусанов.

 

Шу ўринда яна бир маълумот: 2022-йилнинг январь ойидан Президентнинг камбағал ва ишсиз фуқароларни тадбиркорликка жалб этишга доир қатор қарорлари асосида маҳаллаларда 1000 та ўқув масканлари фаолияти йўлга қўйилади. Уларда тикувчилик, сартарошлик, қандолатчилик каби касбларга қайта ўқитилади. Натижада, йилига 26 000 нафар хотин-қизлар ва ёшлар касб-ҳунарли бўлади.

 

Аввалроқ Президент Шавкат Мирзиёев ҳар бир фуқарога давлат ҳисобидан аниқ касб-ҳунарга ўқитиш имконияти яратиши ҳақида айтганди. Шунингдек, вазирлик томонидан ўтказилган брифингда матбуот хизмати раҳбари Мавжуда Мирзаева Бандлик ва меҳнат муносабатлари вазирлиги ажратаётган субсидия кимларга берилиши ҳақидаги саволга батафсил жавоб берганди.

 

Баҳринисо Мадумарова