46 йил аввал ишлаб чиқарилган технологик ускунани Ўзбекистонга янги деб олиб кирмоқчи бўлган қаллоблар фош бўлди

 

Қашқадарёда 46 йил аввал ишлаб чиқарилган технологик ускунани гўёки янги деб олиб кирмоқчи бўлган қаллоблар фош қилинди.  

 

Божхона қўмитаси матбуот хизматининг хабар беришича, вилоятда фаолият кўрсатаётган корхоналардан бирининг номига хориждан келтирилган пўлат сим ишлаб чиқарувчи технологик асбоб-ускуналарни божхонада расмийлаштириш жараёнида навбатдаги қонунбузилиш ҳолати фош этилди.

 

Қайд этилишича, расмийлаштирув жараёнида қиймати 644,6 минг АҚШ долларини ташкил қилувчи мазкур ускуналар “Хавфларни бошқариш тизими”да “қизил” йўлакка йўналтирилгани боис, божхона кўригидан ўтказилди.

 

Аслида ҳужжатларда ушбу технологик ускуналар 2020 йилда ишлаб чиқарилган деб кўрсатилган эди. Боиси, амалдаги тартибларга кўра ишлаб чиқарилганига 3 йилдан ошмаган бу каби ускуналар учун божхона тўловларидан имтиёзлар назарда тутилган.

 

Таъкидланишича, божхона кўриги давомида мазкур технологияларнинг бири 1975 йилда, иккинчиси эса 2017 йилда ишлаб чиқарилгани аниқланди. Уларни ҳужжатларда гўёки 2020 йилда ишлаб чиқарилган деб кўрсатиш орқали  юк эгалари ноқонуний равишда божхона тўловларидан 1 миллиард 33 миллион сўмлик имтиёзларни қўлга киритмоқчи бўлган.

 

Ҳозирда мазкур ҳолат юзасидан божхона органлари томонидан суриштирув ишлари олиб борилмоқда.

 

Аввалроқ Қашқадарёда бировнинг уйига меҳмонга келган шахс машина ўғирлаб қочиб кетгани, Қувасойда чет давлатга ишга юборишни ваъда қилиб, алдаган шахсга жиноят иши қўзғатилгани, Фарғонада пластик картадан пул ўғирлаган шахс қўлга тушгани, Учтепада 15 млн сўм миқдоридаги қарийб 1000 метрлик кабеллар ўғирлангани ҳамда Харидорга чой содасини кимёвий модда сифатида ўтказаётган фирибгарлар ушлангани ҳақида хабар берилганди.