Қалбаки пул тайёрлаган шахслар ушланди
Давлат хавфсизлик хизмати Тошкент вилояти бошқармаси ҳамда Бош прокуратура ҳузуридаги Департаментнинг ҳудудий бошқармаси ходимлари ўзаро ҳамкорликда Янгийўл шаҳрида ўтказган тезкор тадбирда қалбаки пул тайёрлаш билан шуғулланувчи шахслар ушланди.
Қайд этилишича, 1993 йил Қашқадарё вилоятида туғилган фуқаро Янгийўл шаҳридаги яшаш манзилида онаси ҳамда аёли билан биргаликда қалбаки миллий валюта тайёрлаш билан шуғулланган.
Ўтказилган тезкор тадбир давомида улардан 19,6 млн. сўм миқдоридаги 196 дона қалбаки 100 минг сўмлик купюра, 2 та компьютер, 2 та рангли принтер, қоғоз кесиш ускунаси ва бошқа ашёвий далиллар олиниб расмийлаштирилди.
Унинг яшаш хонадонида 1 дона пневматик тўппонча борлиги ҳам аниқланиб, тегишли тартибда олиб қўйилди.
Шу билан бирга, қалбаки валюта сотиб олиш учун келган Самарқанд вилоятининг Нуробод туманида яшовчи, 1971 ва 1984 йилларда туғилган, муқаддам судланган 2 нафар шахс ҳам ҳибсга олинди.
Ҳозирда мазкур ҳолат юзасидан жиноят иши қўзғатилиб, тергов ҳаракатлари олиб борилмоқда.
Эслатиб ўтамиз, бундан аввал ДХХ томонидан қалбаки пул ишлаб чиқараётган шахслар аниқлангани ҳамда сохта долларга телефон сотиб олган фирибгар ушлангани ҳақида хабар берилганди.
Чўлпоной Аҳмедова
