АҚШ Халқаро тараққиёт агентлиги (USAID) Ўзбекистон билан ҳамкорликни кенгайтиришини маълум қилди
Ташқи ишлар вазири Абдулазиз Кoмилов АҚШ Халқаро тараққиёт агентлиги (USAID) маъмури Саманта Пауэр билан телефон орқали мулоқот қилди.
Ташқи ишлар вазирлиги хабарига кўра, суҳбат чоғида Ўзбекистон билан USAID ўртасидаги ҳамкорликнинг бугунги ҳолати ва истиқболлари, устувор дастурлар ҳамда лойиҳаларни амалга ошириш масалалари муҳокама қилинди.
Қайд этилиишича, томонлар соғлиқни сақлаш, таълим, қишлоқ хўжалиги, суд-ҳуқуқ тизимини такомиллаштириш каби соҳалардаги ҳамкорликни давом эттиришга тайёр эканини билдирди.
Афғонистондаги бугунги вазият, мамлакатда инқирозни олдини олиш мақсадида инсонпарварлик ёрдамини кўрсатиш, халқаро ҳамжамиятнинг бу борадаги саъй-ҳаракатларини мувофиқлаштириш масалалари юзасидан фикр алмашилди.
Маълумот учун: жорий йилнинг 21 сентябрь куни Ўзбекистон ташқи ишлар вазири АҚШ USAID раҳбари ўртасида бўлиб ўтган онлайн музокаралар чоғида мамлакатимизда соғлиқни сақлаш, таълим, қишлоқ хўжалиги соҳасидаги дастурларни амалга ошириш, суд-ҳуқуқ тизимини такомиллаштириш, Ўзбекистоннинг COVID-19'га қарши курашини қўллаб-қувватлаш борасидаги ҳамкорликни давом эттириш юзасидан келишувга эришилган эди.
Эслатиб ўтамиз, Ташқи ишлар вазири чет элдаги баъзи шахслар Ўзбекистонни асоссиз танқид қилишига эътибор қаратганди.
Аввалроқ Абдулазиз Комилов Теҳрондаги Афғонистон масаласига бағишланган учрашувда иштирок этгани, Ўзбекистон Афғонистондаги вазият барқарорлашувида муҳим роль ўйнаши мумкинлиги, АҚШ Давлат котиби ўринбосари Ўзбекистон расмийлари билан Афғонистондаги вазиятни муҳокама қилгани ҳамда Абдулазиз Комилов Туркий тилли давлатлар кенгашининг Афғонистон бўйича йиғилишида иштирок этиши ҳақида хабар берилганди.
