Тошкентдаги пичоқбозлик бўйича ИИБ муносабат билдирди

 

Ижтимоий тармоқларда бир қанча эркаклар иштирокида жанжал акс этган видеолавҳа тарқалди. Тасвирда эркаклар бир-бирига пичоқ кўтариб, ҳужум қилган ҳолатларга ҳам гувоҳ бўлиш мумкин.

 

Аниқланишича, воқеа жорий йилнинг 31 октябрь куни тахминан соат 22.00 ларда Тошкент шаҳридаги Боғишамол кўчасида бўлган. Бир нечта фуқаролар ўзаро келишмовчилик сабаб жанжаллашган. Хусусан, 30 ёшли Ж.И. ва унинг танишлари 30 ёшли M.X., 39 ёшли Ж.А., 24 ёшли У.р., 37 ёшли X.A., 27 ёшли X.С. ҳамда 30 ёшли У.д жанжалда иштирок этган. Гумонланувчилардан бири 30 ёшли Ж.И. қочмоқчи бўлган "Chevrolet Equinox" русумли автомобильга зарар ҳам етказган.

 

Мазкур ҳолат юзасидан Юнусобод тумани ИИО ФМБ тергов бўлими томонидан Жиноят кодексининг 277-моддаси 2-қисми “Б” ва “в” бандлари билан жиноят иши қўзғатилган.

 

Ҳозирда мазкур иш юзасидан тергов жараёнлари давом этмоқда.

 

Аввалроқ Қамашида 17 ёшли қиз қўшни йигитни 29 маротаба пичоқлагани ҳамда Тошкентда дзюдочи Камолиддин Расулов бошқа спортчи томонидан пичоқлаб, ўлдирилгани ҳақида хабар бергандик.

 

Муножат Валиева