Сирдарёда сохта ҳужжатлар орқали 500 миллион сўм кредитни қўлга киритган фирибгарлар ушланди

 

Бош прокуратура ҳузуридаги Департамент ахборот хизматининг хабар беришича, департаментнинг Гулистон шаҳар бўлими томонидан ҳудудий ҳудудий тижорат банки филиалининг мурожаатига асосан терговга қадар текширув ўтказилган.

 

Унда аниқланишича, фуқаролар Д.Х., Д.М. ва бошқалар ўзганинг мулкини қўлга киритиш мақсадида олдиндан тил бириктириб, “Т.” МЧЖ раҳбари Б.ни алдаб келгани маълум бўлди.

 

Қайд этилишича, МЧЖ номига кредит олиш учун “МАН” русумли юк автотранспорт воситасини фуқаро Х.нинг номига сохта маълумотлар киритиш йўли билан гаровга қўйишиб, натижада банк муассасасидан 500 миллион сўм кредит ажратишга эришган.

 

Шундан сўнг, ушбу кредит маблағларини шахсий эҳтиёжларига ишлатиб юборганликлари аниқланган.

 

Мазкур ҳолат юзасидан Жиноят кодексининг 168-моддаси (фирибгарлик) ва 228-моддаси (ҳужжатлар, штамплар, муҳрлар,бланкалар тайёрлаш, уларни қалбакилаштириш, сотиш ёки улардан фойдаланиш) билан жиноят иши қўзғатилди.

 

Ҳозирда тергов ҳаракатлари ўтказилмоқда.

 

Эслатиб ўтамиз, аввалроқ Термизда 800 миллион сўмни ўз эҳтиёжлари учун сарфлаб юборган, Бухорода ногиронлик нафақасини расмийлаштириб беришни ваъда қилган фирибгар ушлангани ҳамда фирибгар танишининг ишончига кириб, уни "ухлатиб" кетгани ҳақида хабар берилганди.