Бектемир туманида юк автомобили устига бетон тушиб кетди
Ҳайдовчи O.T. енгил тан жароҳати билан шифохонага мурожаат қилган.
Бундан аввалроқ Зангиотага кетаверишда юк автомобили иштирокида аянчли ЙТҲ юз бергани ҳақида хабар қилган эдик. Ушбу ҳолат бўйича Ички ишлар вазирлиги Йўл ҳаракати хавфсизлиги Бош бошқармаси маълумот тақдим этди.
Маълум қилинишича, бугун соат 07:30 ларда Тошкент шаҳар, Бектемир тумани ҳудудидан ўтган "Сергели-Бўстонлиқ" автомобиль йўлининг 18-километрида бўлган. 1995 йилда туғилган ҳайдовчи O.T. "Камаз" русумли автомобилда ҳаракатланаётиб кескин тормоз берган.
Оқибатда юкхонада бўлган бетон устунлар жойидан олдинга силжиб, автомобилнинг кабина қисмига зарар етказган. Ҳозирда ҳайдовчининг аҳволи яхши.
Мазкур ЙТҲ юзасидан Тошкент шаҳар ИИББ ЙҲХБ ходимлари томонидан суриштирув олиб борилмоқда.
Эслатиб ўтамиз, аввалроқ "Бек тўпи" рўпарасида автокран ва юк автомобили тўқнашганди.
Шунингдек, Тошкентда "Nexia 3" билан тўқнашган "Matiz" ағдарилиб кетгани, Форишда рўй берган ЙТҲ оқибатида 2 нафар йўловчи вафот этгани, Қашқадарёдаги ЙТҲ ҳайдовчи ўлими билан якун топгани ҳамда Жиззах вилоятида юк автомобиллари иштирокида йўл-транспорт ҳодисаси содир бўлгани ҳақида хабар берилганди.
