Энди пахта етиштириш учун даъвогарлик қилиш мумкин

 

Пахта-тўқимачилик кластерини ташкил этиш учун талабгор ихтиёрий равишда ҳар йили 10 сентябргача ЯИДХП орқали ариза билан мурожаат қилади.

 

Мурожаат Қишлоқ хўжалиги вазирлиги (Вазирлик) томонидан 2 кун ичида кўриб чиқилади.

 

Республика комиссияси талабгорларнинг аризаларини ҳар йили 1 октябргача кўриб чиқиб, қарор қабул қилади.

 

Ҳукумат қарори билан тасдиқланган низомга кўра, пахта-тўқимачилик кластерлари қуйидаги шаклда ташкил этилади:

🔸 қишлоқ хўжалиги ер участкаларини ижарага олган ҳолда пахта етиштириш;

🔸 пахта хомашёсини шартнома асосида фермер хўжаликлари ва бошқа пахта етиштирувчилардан сотиб олиш;

🔸 қишлоқ хўжалиги ер участкаларини ижарага олган ҳолда пахта етиштириш ҳамда пахта етиштирувчилардан шартнома асосида сотиб олиш.

 

Пахта-тўқимачилик кластерини ташкил этиш тўғрисидаги тегишли ҳужжат қабул қилингач:

👉 3 кун ичида(иш кунлари) Вазирлик талабгорларни хабардор қилади;

👉 5 кун ичида(иш кунлари) талабгор билан 30 йил (чет эл инвестициялари иштирокидаги корхона ёки чет эл юридик шахси бўлган тақдирда 25 йилгача бўлган) муддатга битим тузилади;

👉 3 кун ичида(иш кунлари) пахта-тўқимачилик кластери тегишли туман (шаҳар) ҳокими билан ер ижараси шартномаси тузади (кластер ер участкаларини ижарага олган ҳолда ташкил этилган тақдирда).

 

Шунингдек, ижарага олган ҳолда ташкил этилган пахта-тўқимачилик кластери ўзига бириктирилган ерларни шахсларга 1 йилгача бўлган муддатга иккиламчи ижарага (уларни учинчи шахсга бериш ҳуқуқисиз) бериш ҳуқуқига эга.

 

Эслатма. Пахта-тўқимачилик кластери фаолияти самарадорлиги билан боғлиқ масалалар юзасидан бир йилда камида бир марта мониторинг ўтказилади.

 

Аввалроқ пахта йиғим-терим харажатларини молиялаштириш тизими такомиллаштирилиши ҳамда фермер хўжаликлари ер солиғидан озод қилиниши ҳақида хабар берилганди. 

 

Оламгир Абдиев