Умумий овқатланиш жойлари учун солиқ тўлашда имтиёз берилади
Бундан мақсад — коронавирус пандемияси даврида умумий овқатланиш ва туризм соҳаларида фаолият юритаётган тадбиркорлик субъектларини қўшимча равишда қўллаб-қувватлаш.
Умумий овқатланиш корхонаси эгалари бир неча турдаги солиқларни, шунингдек, мавжуд қарздорлик ҳамда барча солиқлар бўйича жарима ва пеняларни 2022 йил 1 январдан 1 июлгача фоизларсиз кечиктириб ёки бўлиб-бўлиб тўлаш имкониятига эга.
Маълумот учун, ушбу тартибга 2021 йил 15 август ҳолатидаги қарздорлик, жарима ва пенялар инобатга олинади.
Эслатма. Овқатланиш корхоналарига ресторан, кафе, ошхона ва ҳоказолар киради.
Мазкур солиқлар қуйидагилар:
➖ айланмадан олинадиган солиқ;
➖ фойда солиғи;
➖ сув ресурсларидан фойдаланганлик учун солиқ;
➖ юридик шахслардан олинадиган ер солиғи;
➖ юридик шахсларнинг мол-мулкига солинадиган солиқ ва йиғимлар.
Бундан ташқари, 2021 йил 1 сентябрдан бошлаб умумий овқатланиш корхоналари юридик шахслардан олинадиган ер солиғи ва юридик шахсларнинг мол-мулкига солинадиган солиқни тўлашдан озод қилинади мазкур тартиб 2021 йилнинг 31 декабрига қадар амал қилади.
2023 йил 1 сентябрга қадар эса туристик (меҳмонхона) йиғимини ҳисоблаш ва тўлаш тартиби ҳам тўхтатилади.
Аввалроқ солиқ тўлашдан бўйин товлаган шахс жавобгарликка тортилиши ҳамда табиий офат оқибатида зарар кўрган тадбиркорлар солиқлардан озод этилиши ҳақида хабар берилганди.
Оламгир Абдиев
