Қашқадарёда ҳайдовчига 10 сутка маъмурий қамоқ жазоси тайинланди

 

Қашқадарё вилояти, Чироқчи тумани ҳудудида тезликни меъёридан оширган транспортларни қайд этувчи махсус мослама билан жиҳозланган автомобилда хизмат олиб борган ЙПХ ходими тезлик қоидаларини бузган "Cobalt" русумли автомобиль ҳайдовчисини тўхтатган. Ҳайдовчи Ш.А. машинадан тушиб ходимнинг ёнига келиб тезликни меъёрдан оширганлиги бўйича қайд этилган қоидабузарликни ўчиришини сўраб ходимга бир қанча эътирозлар билдирган. 

 

Вазият кескинлашиб, атрофга фуқаролар тўпланган. Қашқадарё вилояти ИИБ ЙҲХБ масъуллари томонидан тегишли ҳужжатлар тўплангани ва ҳолат Жиноят ишлари бўйича Чироқчи тумани судида ўрганилиб чиқилган.

 

Фуқаро Ш.А. Ўзбекистон Республикаси Маъмурий жавобгарлик тўғрисидаги Кодекснинг 195-моддасида кўрсатилиб ўтилган ҳуқуқбузарликни содир этганликда айбдор деб топилди ва унга нисбатан 10 сутка маъмурий қамоқ жазоси тайинланди.

 

Аввалроқ Наманганда қоидабузар ЙПХ ходимига пора таклиф қилгани ҳамда Тошкентда ЙПХ ходими қоида бузган ҳайдовчига чора кўрмасдан кетишига рухсат бергани ҳақида хабар берилганди.

 

Муножат Валиева