Наманганда қоидабузар ЙПХ ходимига пора таклиф қилди

 

Наманган вилоят ЙҲХББ матбуот хизмати хабарига кўра, 1 декабрь куни соат 08:00 ларда Наманган вилояти, Поп тумани ҳудудида жойлашган "Наманган" мунтазам ЙПХ масканида хизмат олиб бораётган ЙПХ ходими томонидан маскандан ҳаракатланиб ўтаётган "Cobalt" тўхтатилган. Текширув давомида автомобилда 16 дона тегишли ҳужжатларсиз телевизорлар олиб кетилаётгани маълум бўлган ва баённома орқали туман ИИБга олиб келинган.

 

Маълум бўлишича, ҳайдовчи ҳолат юзасидан тегишли чора кўрилмаслиги учун ЙПХ ходимига 1000 доллар пул ва 4 дона телевизор беришни таклиф қилган. ЙПХО командири ўринбосари мазкур ҳолат бўйича вилоят ИИБ бошлиғига билдирги орқали пора таклиф қилаётган фуқарога қонуний чора кўрилишини сўраган.

 

Билдирги асосида ҳуқуқни муҳофаза қилувчи орган ходимлари ҳамкорлигида тезкор тадбир ўтказилиб, Поп тумани ИИБ маъмурий биноси ёнида ҳайдовчи, Х.С. (1992 йилда туғилган) ЙПХ ходимига 900 долларни пора тариқасида берган вақтда ашёвий далиллар билан ушланган.

 

Мазкур ҳолат юзасидан ҳозирда терговга қадар текширув ҳаракатлари олиб борилмоқда.

 

Эслатиб ўтамиз, аввалроқ автомашинасини жарима майдончасидан чиқариб бериш эвазига инспекторга пора бермоқчи бўлган шахс, Сурхондарёда ЙПХ ходимини капотда судраб кетган ҳайдовчига чора кўрилгани ҳамда Тошкентда "Lacetti" ҳайдовчиси ЙПХ ходимига бўйсунмай қочиб кетгани ҳақида хабар берилганди.