Миграция агентлиги собиқ мансабдорлари хорижга ишга юбориш бўйича коррупцион схема тузгани аниқланди

Ўзбекистондан Жанубий Кореяга меҳнат муҳожирларини ишга жўнатиш билан боғлиқ йирик коррупцион схема фош этилди. Бу ҳақида Бош прокуратура ҳузуридаги Иқтисодий жиноятларга қарши курашиш департаменти хабар берди.

 

Маълумотларга кўра, бир гуруҳ шахслар — жумладан Ташқи меҳнат миграцияси агентлигининг (ҳозирги Миграция агентлиги) собиқ мансабдорлари ҳамда хусусий бандлик агентликлари вакиллари — олдиндан тил бириктириб, уюшган жиноий гуруҳ тузган.

 

Улар Жанубий Кореяга ишга юборишни ваъда қилиб, 35 нафар фуқародан жами 263,5 минг АҚШ доллари олган. Шунингдек, расмий тўловлардан ташқари ҳар бир фуқародан 7–12 минг долларгача ноқонуний маблағ ундирилган бўлиб, умумий зарар миқдори қарийб 90 млн долларга етгани қайд этилган.

 

Яна бир ҳолатда гуруҳ 230 нафар фуқарони Кореяга ишга юбориш эвазига 580 минг доллар олгани, шунингдек, Кореяда бўлган 1000 нафар фуқародан ноқонуний тарзда 5,6 млн доллар ундиргани аниқланган. Умумий зарар миқдори 45 млн долларга етган.

 

Ҳозирда Кореяга ишга юборилмаган 600 дан ортиқ фуқаролардан келиб тушган мурожаатлар ҳам кўриб чиқилмоқда. Тергов органлари етказилган зарар ҳажмини аниқлаш ва маблағларни қайтариш бўйича чоралар кўрмоқда.

 

Мазкур ҳолат бўйича жиноят иши қўзғатилган ва ҳозирда тергов ишлари олиб борилмоқда.

 

Бош прокуратура департаменти ушбу уюшган жиноий гуруҳ фаолиятидан зарар кўрган фуқароларни 71-233-10-07 ишонч телефони орқали мурожаат қилишга чақирди.

 

Шунингдек, мурожаат қилган шахсларнинг маълумотлари махфий сақланиши таъкидланган.

 

Аввалроқ Жанубий Кореяга ишга юбориш учун 400 минг доллардан ортиқ маблағни ўзлаштирган шахслар қўлга олингани ҳақида хабар берилганди.

 

Абдуллаева Шахризода