АҚШдан яна 24 нафар ўзбекистонлик депортация қилинди
Улар иммиграция қоидаларини бузганликда айбланган.
АҚШ иммиграция қонунчилигини бузганликда айбланиб депортация қилинган 24 нафар Ўзбекистон фуқароси чартер рейс орқали Тошкентга олиб келинди. Бу ҳақда Дунё ахборот агентлиги хабар берди.
Маълум қилинишича, АҚШдан учиб келган махсус чартер рейси Тошкент халқаро аеропортига қўнган.
Фуқароларни ватанига қайтариш жараёни Ўзбекистон ва АҚШнинг ваколатли идоралари ўртасидаги мувофиқлаштирилган ҳамкорлик асосида амалга оширилган. Ҳамкорлик доирасида шахсларни идентификация қилиш, ҳужжатларни расмийлаштириш ҳамда уларнинг хавфсиз қайтишини таъминлаш билан боғлиқ барча ташкилий-ҳуқуқий масалалар тезкор тартибда ҳал этилган.
Қайд этилишича, Ўзбекистон миграция жараёнларини тартибга солиш, ноқонуний миграция ҳолатларининг олдини олиш ҳамда хорижда бўлиб турган фуқароларнинг ҳуқуқ ва манфаатларини ҳимоя қилиш йўналишида хорижий ҳамкорлар билан мунтазам ҳамкорликни давом эттирмоқда.
Мутасаддилар фуқароларни хорижга чиқишда қабул қилувчи давлатларнинг миграция ва яшаш қоидаларига қатъий риоя этишга чақирмоқда.
Эслатиб ўтамиз, аввалроқ АҚШда 4,5 миллион долларлик товарларни ўғирлашда гумонланган, ноқонуний пойга уюштирган ўзбекистонликлар қўлга олингани ҳақида хабар берилган эди.
