Миграция агентлигида 1 млрд сўмдан ортиқ бюджет маблағлари талон-торож қилингани аниқланди
Айрим ходимларга ишламаган даври учун иш ҳақи ва қонунчиликка зид равишда рағбатлантириш пуллари тўланган, ҳолат юзасидан жиноят иши қўзғатилди.
Миграция агентлигида 1 млрд сўмдан ортиқ бюджет маблағлари талон-торож қилингани юзасидан жиноят иши қўзғатилди.
Бош прокуратура ҳузуридаги Департаментнинг Тошкент шаҳар бошқармаси томонидан ўтказилган терговга қадар текширувда агентликнинг масъул шахслари икки нафар ходим — Б.Д. ва Н.А.нинг амалда ишламаган даври учун уларга 931,6 млн сўм иш ҳақи ҳисоблагани аниқланган.
Шунингдек, интизомий жазо қўлланилган ва жазо муддати давом этаётганига қарамай, Меҳнат кодекси талабларига зид равишда яна 8 нафар ходимга 88,5 млн сўм тўлаб берилгани маълум бўлган.
Ҳолат оқибатида жами 1 млрд сўмдан ортиқ бюджет маблағлари ўзлаштириш ёки растрата йўли билан талон-торож қилингани қайд этилди.
Мазкур ҳолат юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) билан жиноят иши қўзғатилиб, тергов ҳаракатлари олиб борилмоқда.
Аввалроқ ўзини Миграция агентлигининг собиқ бўлим бошлиғи Азизбек Тоштемиров деб таништирган шахс Теlegram'даги “Корея 24 соат” каналида агентликнинг амалдаги ва собиқ раҳбарларига оид қатор постларни эълон қилганди.
“Корея 24 соат” каналидаги постларда Миграция агентлигининг собиқ раҳбари Афзал Эрматов пандемия даврида Жанубий Кореяга ишчиларни юбориш учун сунъий навбатлар ташкил этгани, айрим фуқаролардан қўшимча маблағлар ундиргани ва имтиҳон жараёнларига ноқонуний аралашув бўлгани ҳақидаги даъволар илгари сурилган. Шунингдек, амалдаги директор Беҳзод Мусаевга нисбатан ҳам қатор айбловлар билдирилган. Хусусан, хусусий бандлик агентликларига лицензия бериш жараёнлари, Кореяга ишчи юбориш тизими ва айрим шахсий топшириқлар билан боғлиқ ҳолатлар юзасидан иддаолар келтирилган.
Май ойида эса Бош прокуратура ҳузуридаги департамент ўзбекистонликларни Жанубий Кореяга ишга юбориш билан боғлиқ йирик коррупсион схема фош этилганини маълум қилган эди. Дастлабки маълумотларга кўра, ушбу схема орқали фуқаролардан 100 миллион доллардан ортиқ маблағ ноқонуний ундирилган.
