Ахборот ва оммавий коммуникациялар агентлигида “Марказий Осиё дунё цивилизациялари чорраҳасида” халқаро маданият форуми ва Халқаро бахшичилик фестивалига тайёргарлик жараёнларига бағишланган матбуот анжумани бўлиб ўтди.
Қайд этилишича, форум доирасида бир қатор тадбирларнинг ҳам ўтказилиши белгиланган, хусусан, Хива шаҳрида ТУРКСОЙ ташкилотига аъзо давлатлар маданият вазирларининг навбатдаги мажлисини ўтказиш кўзда тутилган. Фестивалда иштирок этиш учун бугунги кунга қадар ЮНЕСКО ва Таълим, фан ва маданият масалалари бўйича Ислом ташкилоти (АЙСЕСКО) каби халқаро ташкилотлардан ижрочилар, конференция иштирокчилари, ҳакамлар ҳайъати аъзолари, Халқаро ташкилотлардан фахрий меҳмонлар ҳамда оммавий ахборот воситалари ходимлари рўйхатдан ўтказилган.
Тошкент шаҳрида Ўзбекистон маданий меросини асраш, ўрганиш ва тарғиб қилиш бўйича бутунжаҳон жамиятининг V халқаро конгресси, Хива шаҳрида ЮНЕСКО билан ҳамкорликда Маданий мерос масалалари бўйича халқаро халқаро маслаҳат қўмитаси кенгашининг йиғилиши, Нукус шаҳрида “Археология ва туризм; салоҳиятни белгилаш ва меросни бошқариш” халқаро археология конференцияси ҳамда II Халқаро бахшичилик санъати фестивалини ўтказиш белгиланган.
Фестиваль доирасида ўтказилиши режалаштирилган конференцияни эпидемиологик вазиятни инобатга олган онлайн ва оффлайн (гибрид) шаклда ўтказиш режалаштирилган.
Бундан ташқари, Маданий мерос ҳафталиги доирасида ўзбек санъатининг жаҳон ва маҳаллий тўпламларда сақланаётган дурдоналарига бағишланган «Ўзбекистон маданий мероси дунё тўпларида» туркумидаги 50 та ноёб китоб-альбом тақдимоти ташкил этилади.
Аввалроқ АҚШ ва Канада шахсий тўпламларида сақланаётган Ўзбекистон маданий мероси дурдоналари ҳақида жилд нашр этилгани, Ўзбекистонда илк бор китобхонлар учун янги нашр уч тилда тақдим этилгани, Ўзбекистон маданий меросини сақлаш, ўрганиш ва оммалаштириш бўйича бутунжаҳон жамияти керамика, металлга бадиий ишлов бериш, бадиий тўқимачилик ва тасвирий санъатга бағишланган альбомларни бирлаштирган "Ўзбекистон санъатининг дурдона асарлари" номли тўпламини тақдим этгани ҳамда Грецияда жойлашган "Сарсетакиснинг Ўзбекистон галереяси"га бағишланган китоб-альбом нашр этиш бўйича музокаралар олиб борилгани тўғрисида хабар берилганди.