Алишер Усмонов сайловда яна ғалаба қозонди
Эслатма. Усмонов 2008 йилдан бери Халқаро қиличбозлик федерациясини бошқариб келмоқда.
Швейцариянинг Лозанна шаҳрида бўлиб ўтган Халқаро қиличбозлик федерациясининг Конгрессида амалдаги президент Алишер Усмонов ғалаба қозониб, ташкилотдаги бошқарувини давом эттирадиган бўлди.
Мазкур тадбирга расмий меҳмон сифатида ташриф буюрган Халқаро Олимпия қўмитаси президенти Томас Бах Алишер Усмоновни сайловдаги ғалабаси билан табриклаган.
Таъкидлаш керак, сайлов якунларига кўра яна бир нечта ҳамюртларимиз ҳам ташкилотнинг бир қатор бўлимлари таркибий қисмига киритилди. Жумладан, Ўзбекистон қиличбозлик Федерацияси Бош котиби Гулнора Саидова тарғибот қўмитаси, Токио-2020 Олимпиадасида реферилик қилган Аида Ҳасанова ҳакамлар қўмитаси таркибига олинди.
Тадбир давомида 2023 йилги жаҳон чемпионати мезбонлигига даъвогар Тошкент шаҳрининг тақдимоти намойиш этилди. Аммо якунда мезбонлик Миланга насиб этди.
Аввалроқ Халқаро қиличбозлик федерацияси президентлигига Алишер Усмоновнинг номзоди кўрсатилгани ҳамда қиличбозлик бўйича илк халқаро синов-имтиҳони бошлангани ҳақида хабар берилганди.
