Zamon 
Британия бош вазири махсус вакили Саймон Гасс 5 октябрь куни Афғонистонга ташриф буюрган. У бош вазирнинг биринчи ва иккинчи ўринбосарлари Мулла Бародар ва Абдусалом Ханафий, шунингдек, ташқи ишлар вазири Амирхон Мутаққий билан учрашган.
Буюк Британия ташқи ишлар вазирлиги учрашувда гуманитар инқироз, терроризмга қарши кураш, аёллар ва диний ҳамда миллий озчилик ҳуқуқлари масалалари кўтарилганини маълум қилди. Бундан ташқари Гасс толибларни Афғонистонни тарк этиш истагида бўлганларга тўсқинлик қилмасликка чақирди.
“Толибон” ўз навбатида барча давлатлар, хусусан, Буюк Британия билан муносабатлар яхшиланишидан манфаатдор эканини таъкидлаган. Аммо бунинг учун Британия ҳам конструктив қадамлар ташланиши зарурлигини қайд этган.
Буюк Британия ўз расмий вакилини “Толибон” ҳузурига жўнатган биринчи Ғарб давлати бўлди. Ҳаракат бундан аввал бошқа давлат элчи ва расмийлари билан учрашган бўлса-да, улар орасида Европа вакиллари йўқ эди. Британия бош вазири Борис Жонсон толибларни қонуний ҳукумат сифатида тан олмаслигини айтган. Аммо бошқа Европа раҳбарлари қатори у ҳам ишчи алоқалар сақлаб қолиниши муҳим эканини таъкидлаган.
Бундан аввал Германия Афғонистондаги ҳарбий миссияси учун қанча маблағ сарфлагани ҳамда Кобулда портлаш содир этилгани ҳақида хабар берилган эди.
Жаҳонгир Қўзиев
