ИИБ ҳодимлари фаолиятига асоссиз аралашиб, уларга қаршилик кўрсатган шахсга қонуний баҳо берилади
Ижтимоий тармоқларда Самарқандда ИИБ ходимлари ва фуқаролар ўртасида жанжал бўлгани акс этган видео тарқалди. Ушбу ҳолат юзасидан “Zamon.uz” мухбири Самарқанд вилояти ИИБ матбуот котиби Жаҳонгир Сагдуллаев билан боғланди.
Унинг айтишича, бу воқеа Самарқанд шаҳар Гўрўғли кўчасида бўлган. Шу кўчада яшовчи 1982 йилда туғилган Д.М. маст ҳолда тунги хизматни олиб бораётган ходимлар ёнига келиб, ҳеч бир сабабсиз бақир-чақир қила бошлайди. Бу фуқаро жамиятда ўрнатилган тартиб-қоидаларни қасддан менсимай, ИИБ ходимларининг қонуний фаолиятига аралашган.
Шунингдек, Д.М.ни ИИБга олиб бориш жараёнида у ходимларга фаол қаршилик кўрсатган. Жанжалга Д.М.нинг яқинлари ҳам қўшилиб, уни қўйиб юборишларини сўраган.
Мазкур ҳолат юзасидан Д.М.га нисбатан маъмурий баённомалар расмийлаштирилган. Унинг ноқонуний ҳаракатларига нисбатан суд органлари томонидан якуний қарор қабул қилинади.
Аввалроқ Қашқадарёда профилактика инспекторининг эгнидаги хизмат кийимини йиртган фуқарога нисбатан жиноят иши қўзғатилганди. Шунингдек, депутатлар ва ИИВ ходимлари ўртасида содир бўлган жанжал сабаби очиқлангани ҳақида хабар берилганди.
Муножат Валиева
