Сирдарёда ҳайдовчининг ухлаб қолиши оқибатида йўловчи ҳалок бўлди
Сўнгги пайтларда айрим ҳайдовчиларнинг йўлда ухлаб қолиши оқибатида кўнгилсизликлар юз бериши ортиб бормоқда. Охири ўлим билан якун топаётган ЙТҲларнинг содир бўлиши эса дилни хира қилади.
Сирдарё вилояти Мирзаобод туманида "Matiz" иштирокида йўл-транспорт ҳодисаси содир бўлди. Бу ҳақда ЙҲХББ матбуот хизмати хабар бермоқда.
Маълум қилинишича, воқеа жорий йилнинг 3 октябрь куни соат 04:50 ларда Сирдарё вилояти Мирзаобод тумани ҳудудидан ўтган йўлда содир бўлган.
Қайд этилишича, ҳайдовчи автомобилда Термиз — Тошкент йўналиши бўйлаб ҳаракатланиб келаётган вақтда ухлаб қолган.
Оқибатда, автомашина йўлни иккига бўлувчи темир тўсиққа урилиб, ундаги бир нафар йўловчи воқеа жойида вафот этган.
Аввалроқ Тошкентда ҳайдовчининг ухлаб қолиши оқибатида 3 та машинага шикаст етказилгани, Сурхондарёда ҳайдовчининг ухлаб қолиши оқибатида юк машинасига бориб урилиши оқибатида йўловчи вафот этгани ҳамда Қорақалпоғистоннинг Қўнғирот туманида "Cobalt" ва юк машинаси иштирокида ЙТҲ содир бўлгани ҳақида хабар берилганди.
